www.avdet.org

Bala terbiyesinde, balalarğa, mektep talebelerine milliy ruh aşlav ceryanında muzıka ve yırnıñ rolü ğayet müim oğanını ve aynı zamanda bizde ana tilinde bala yırları yoq derecede az olğanını köz ögüne alaraq, bu saada belli bir konkret areketler yapmaq zarur dep tanıymız.

Belli ki, ana tili, milliy ruh, ana-Vatanğa sevgi, ahlãq ve terbiye balalarımızğa eñ yaş çağından aşlanıp başlanmalı. Şimdiki vaziyetimizde, yani etrafımızdaki hususan ve radio ve televideniyede, sanalarda , mekteplerde, kütleviy tedbirlerde-er yerde başqa medeniyet tesiri ep ziyade yüz bergen zamanda, bu mesele özüne ayrıca diqqat ayırılmasını talap ete. Bu ise, esasen, ana tili ve edebiyatınen, balalarnıñ terbiyesinen, oquv ceryanınen, muzıka ve sanatnen bağlı mutehassılarğa aittir. Bu mesele boyunca çeşit leyhalar tizip teklif etmek mümkün. Böyle tekliflerden biri ‘Mektep yırları’ boyunca konkurs leyhasıdır.

Belli ki, bestekãr tarafından yır yaratılması içün evelã şairler tarafından yırnıñ teren mündericeli, yüksek bediiy seviyede yır teksti yani yırnıñ sözleri yazılması şart. Demek, em bestekãrlarğa, em de qırımtatar şairlerine  muracaat etilmeli. Olarnı meraqlandırmaq ve taqdirlemek içün mezkür leyha ile ‘Mektep yırları’ boyunca konkursı ilãn etile.

Konkursnıñ nizamnamesi

Konkursnı şairlerden, muzıka mutehassıslarından ve diger cemaat erbaplarından ibaret jüri teşkil ete ve ötkere.

Jürige  Edem Dudakov (cemaat erbabı, jüri reisi), Riza Fazıl( yazıcı), Dilãver Osman (yazıcı, jüri kãtibi), Ayder Emirov (cemaat erbabı), Safure Kacametova( cemaat erbabı), Sübiye Nalbandova(telejurnalist), Yunus Ennanov( dirijör), Rustem Komurcı( muzıka ocası), Gulnara Adilşayeva(mektep ocası) kireler.

Konkurs yılda bir kere ötkerilecek.

Konkursnıñ maqsadı- mektepke, onıñ talebeleri içün emiyetine, mektep talebelerine, oquv-bilgige, ana tiline, ocalarğa bağışlanılğan yırlar ve, belki de, ana tilinde bir milliy mektep gimni doğmasına yardım etmektir.

Konkursqa bestekãrlarnı ve şairlerimizni şahsen davet eter ekenmiz, onda tek şairler degil, şiir yazuvda belli bir istidadı olğan aveskãrlar, ‘İlham’ icadiy birleşmesiniñ azaları da iştirak ete bileler.

Konkurs ğaliplerine para mukãfatı berilecek:

1-inci yer içün-3000 grv.

2-nci yer içün- 2000 grv.

3-ünci yer- 1000 grv.

2 dane rağbetlendirici mukãfat- 500 grivnadan

Konkursqa kelgen yırlar jüri azalarına muellifniñ adı yazılmadan, tek bir tahallüs ya da şifr qoyulıp konvertnen jüri kãtibi Dilãver Osmanğa taqdim etilmeli. Adresi:95007. Aqmescit, Vernadskaya prospekti, ev 155, kv.3.

Telefonlar: 63 27 13. Mob. 095 528 44 27

Yırlarnı qabul etüv müddeti 2010 senesi iyün 1-gece.

Jüri