www.avdet.org

‘Men Bağçasaray şeerinde, Veterinarnaya, 58 soqağında 1928 senesi 4 oktãbrde doğuldım. Anam- Ali qızı Muksum(1908 s.), eşitkenimce, aşhanede çalışa edi, babam ise-Qurmulşa oğlu İsmail- Örnek trikotaj fabrikasında motorist olıp çalışa edi. Oktãbr inqilãbından evel babamnıñ qorantası teri işlegen ve olarğa Tabaqçılar dey ediler. Qorantamızda dört oğlan edik. Büyük ağam- Emirali(1924), soñ- Refat ağam(1926), men ve Enver qardaşım(1938).
Soñra biz Aqmescit şeerine köçemiz ve başta Krasnoarmeyskaya, 138 soqağında, soñra Müsülmanskaya (evelden Bezbojnaya) soqağında yaşaymız. Büyük ağam Emirali nemseler kelgen vaqıtta, oblavağa tüşip, Almaniyağa yollanıla. O, endi biz sürgünlikte olğanda, bizni qıdırıp tapa. Refat ağamnı armiyağa alamız dep, emek ordusına yolladılar.
18 mayıs gecesi, saat dörtler edi, avtomatlarnen sovet askerleri kirip, qapunı qaqtılar. Anam qapını açtı. Askerler: ‘sizge 15 daqqa beremiz, 3 künge aş alıp azırlanıñız’ dediler. Bizni maşnalarğa yüklep, Qara Qıyat degen yerge, demiryol vokzalına ketirdiler. Mal vagonlarına yüklediler. Rıqma-rıq adam tolu. Nefes almağa çare yoq.
Yolda aş-suv bermey ediler. Poyezd toqtağan yerde halqımız poyezdden tüşip, tez-tez bir şeyler aşamaq içün azırlamağa istey edi. Anam undan pite pişirmege tırışa edi. Poyezd signal bergende, çiy piteni alıp, keç qalmayıq dep, çapa edi.
Bizni Uralğa, Sverdlovsk vilãyetiniñ Novolalenskiy rayonınıñ Malaya Lata köyüne ketirdiler. Biz kelmezden evel, anda yaşağan halqqa biz aqqında ‘olar adamlarnı aşaylar, boynuzları bar, dört közlü ‘ dep, ayta ekenler. Baraqlarğa ve anda yaşağan adamlarnıñ evine yerleştirdiler. Bizni, anamnı, qardaşımnı ve meni, soyadları Krivobabka olğan qorantağa, ufaçıq bir odağa yerleştirdiler. Ekinci künü işke quvdılar. Başta suvnı cıymaq içün tıynaq yaptıq. Soñra lesopovalğa yolladılar. 1956 senesine qadar anam ve men anda çalıştıq. Qarar çıqqan soñ, Qazahstannıñ Guryev şeerine köçtik.
1987 senesi Vatanıma qavuşıp, Bağçasaray rayonınıñ Hoşdermen köyünde anamnen ve qorantamnen yerleştim. Anam- Ali qızı Muksum 1994 senesi vefat etti.
Qartbabasından yazıp aldı torunı İsmailova Zulfiye, 7 sanlı mektebiniñ 5 sınıf talebesi, 2010 s.