www.avdet.org

  
9 dekabr künü Aqmescitte qırımtatar cemaatçılığı bir yıl evel bu dünyanı terk etken vatanperver Saladin Aciaqaynı añdı. Tam bir yıl evel milliy areketimizniñ faal iştirakçisi, Romaniya Müsülman türk-tatar medeniy merkeziniñ fahriy prezidenti, Bütündünya qırımtatar kongresi Koordinatsion Şurasınıñ azası, Qırımnı bütün canı-vucudınen sevgen ve qayğırğan Saladin Aciaqay 65 yaşında vefat etti.

Bir soy insanlar bu dünyanı terk etseler de, olardan soñ zengin maneviy ve ruhiy miras qala. Saladin ağa öyle büyük ve faydalı iz, teren müsbet tesir, güzel ve aydın hatıra qaldırğan şahıslardandır. O ğayet teren bilgi saibi olıp, fransız, latin ve bir qaç diger tillerini bile edi. Qırımdan Köstencege cemaat vazifeleri ile barğan vatandaşlarımıznıñ episi onıñ er vaqıt sayğı ve sıcaq munasebet köstergenini tasdiqlaylar.
Saladin ağa, deyerli, er sene 18 mayıs matem kününde Qırımda bizlernen beraber olmağa tırışa edi, miting minberinden ve cemaatımız toplanğan başqa yerlerde defalarca çıqışlarda bulundı, çoq yardımlar etti. Onıñ teşebbüsinen ve maddiy qoltutuvınen Romaniyada onlarnen milliy festivaller, kontsertler, qonuşmalar, konferentsiyalar teşkilâtlandırıldı. Onıñ samimiyligi, merametligi, cumertligi halqımızğa hızmette edi.
Saladin ağa Aciaqay aqqında hatıra qalplerimizde daima yaşaycaq.
Qırımtatar cemaatçılığı
Milliy areket veteranlarnıñ gruppası
“Qırım fondu” hayriye cemiyeti