www.avdet.org

Kiyevde qırım bestekãrı Merziye Halitovanıñ muellif kontserti soñ derece yüksek seviyede olıp keçti. Paytaht muzıka muhlisleri  Vladimir Şeykonıñ rehberliginde Ukraina Milliy radiokompaniyanıñ Akademik simfonik orkestrniñ icrasinda Merziye hanımnıñ muzıka tılsımı altında qaldılar.

Memleketniñ eñ güzel kontsert zalı  ‘Bağışlav’№3 simfoniyası, ‘Demirciniñ eteginde ’orkestr ile truba içün kontserti, orkestr ile kemane içün ‘ Kapriçço’ ve fleyta ve telli orkestr içün ‘Ana-baba hatırası’nıñ 4-ünci simfoniyasınıñ acayip nağmeleri ile toldı. Diñleyiciler qırımtatar bestekãrınıñ orkestr eserleriniñ instrumental zenginligini incelikten his ettiler. Kontsert tam anşlag ile keçti.

‘Filarmoniyamız çoq şey kördi, amma bu kontser ve bu muzıka er kesni coşqun etti’, dep qayd etti Milliy Filarmoniyanıñ müdiri.

Merziye hanım ise olıp keçken kontsertni  ömründeki emiyetli yeñişlerinden biri olaraq qabul ete. ‘Bu tek menim ömrümde degil de, bütün haqlımıznıñ yaşayışında büyük bir vaqiadır. Çünki Milliy filarmoniyada muellif kontsertini bermek- büyük şereftir. Bir çoq meşür bestekãrlar bile mında öz kontsertlerini siyrek keçireler.’

Merziye Halitova bütün ömrüni klassik muzıkasına bağışladı. O Taşkent konservatoriyasını, nazariye- bestekãr fakültetini, professor G.Muşelniñ sınıfını  bitirdi. Bundan soñ Taşkent konservatoriyası yanındaki mahsus orta muzıka mektebinde kompozitsıya boyunca ders berdi. Çoq beklenilgen  qırımğa avdetinden soñ, 1993 senesi, Merziye ahnım Aqmescitteki Çaykovskiy adına muzıka oquv yurtunda kompozitsıya sınıfını alıp bardı, ‘Qırım’ devlet teleradiokompaniyasında qırımattar redaktsıyasınıñ muzıkal redaktorı vazifesinde çalıştı. ‘Qırım’ telekanalında qırımtatar professional muzıkasınıñ inkişafı, qırımtatar muzıka medeniyetiniñ belli erbapları- Yaya Şerfedinov, İlyas Bahşış, Edem Nalbandov ve digerler aqqında bir sıra muellif yayınları çıqqan edi.

Öz eserlerinde Merziye hanım öz halqınıñ tabiatını, onıñ em quvançlı em facialı çizgilerini terenden añlap ifade ete. Misal olaraq, onıñ ‘Bağışlav’ simfoniyasını diñlegende istee istemez halqımıznıñ sürgünlik faciasınıñ deşetli levhalarını köz ögüne ketiresiñ. Truba içün kontserti ise- Qırım yalı boylarındaki acayip manzaralarını canlandıra.