www.avdet.org

Bu ulu insannıñ obrazı eñ teren diqqat ve taqlitke lãyıqtır.  Özüne tabiy etken semağa sarsılmaz ıntıluv onıñ taqdirini belgiledi. Aviatsıya onı ömürlik esir etti ve bütün vaqtını o, eñ-evelã, uçaqlarğa ayıra edi.

Amethan Sultannıñ adı dünya tarihına altın arifler ile cesürlik ve sabitlik, fedakãrlıq ile vatanına hızmet, borcuna sadıqlıq temsili olaraq yazılacaqtır. Sovet Birliginiñ eki defa qaramanı, Devlet mukãfatnıñ laureatı, nam qazanğan uçucı- sınavcı, Yaroslavl ve Melitopol şeerleriniñ fahriy vatandaşı, Frantsıyanıñ fahriy ucucısı, Qırımnıñ fahriy vatandaşı Alupkada doğdı ve onı bütün dünyağa şerefledi. Ulu vatan cenki vaqtında alman faşistlerine qarşı uruşlarda onıñ rolü ğayet emiyetlidir.

Öz ucucı-sınavcılıq faaliyetinen Amethan Sultan dünya, vatan aviatsıya ve kosmonavtikasınıñ inkişafına da büyük issesini qoştı. O birinciler sırasında büyüksesli ucuşlarını menimsedi, covet kosmonavtlarnıñ ilk gruppasını azırlavında iştirak etti. Amethan Sultan 1971 senesi 1 fevralde küçlü köçürüciniñ sınavı vaqtında vefat etti.

2010  senesi 1 fevralde ‘Qırımtatar sanat müzeyi’ niñ teşebüssi ile Aqmescitte Amethan Sultan adına meydanında ulu ucucınıñ vefat künü munasebiti ile tantanalı şekilde hatıra tahtasına çiçekler qoyuldı.

Merasimni Kebir caminiñ imamı Niyazi efendi duanen başladı. Efsaneviy uçucınıñ hatırasını añmaq içün QMC-niñ yerli şura deputatları, Ulu Vatan cenkiniñ veteranları, milliy areketniñ veteranları, aviatsıya, cemaat teşkilãtlarınıñ, iş ve oquv kollektivlerniñ temsilleri, medeniyet ve tasil erbapları, yazıcılar keldiler.

Kelgenler Ametha Sultan aqqında öz hatırlavları ile paylaşa, safdaşlarından bildirgen onıñ yüksek insanlıq ve proffesional çizgileri aqqında beyan ettiler. Aqmescşitteki 4 mektep talebesi Amethan Sultanğa bağışlanılğan şiirni oqudı. ‘Namus’ teşkilãtınıñ vekili Ziyadinov F. İle aviatorlarnıñ ‘Vatan qanatları’ teşebbüs gruppası tarafından  QMC-niñ Yuqarı Şurasınıñ reisi Gritsenko A.Pge doğrulğan ‘Aqmescit’ aeroportına eki defa Sovet birili qaramanı Amethan Sultannıñ adı berilmesi aqqında muracaatına qoltutmaq teklifini bulundırğan rezolütsıya oquldı.

Amethan Sultan- bizim tarihımız ve qururımızdır. O ne qadra ulu olsa o qadar da alçaqgöñülli edi. O aqqında hatıra onıñ içün degil de bizim içün kerektir.

Bu sene 25 oktãbrde o 90 yaşını toldurır edi... Bu tarih oña lãyıq olğan derecede qayd olunır degen ümüttemiz.

Gemeci Nuriye

Qırımtatar sanat müzeyi

Sovet birliginiñ eki defa qaramanı, podpolkovnik, SSSRde nam qazanğan uçucı-sınavcı, Qırım Muhtar Cümhüriyetiniñ fahriy vatandaşı Amethan Sultannıñ facialı vefatına 39 yıl tolğanı munasebeti ile keçirilgen mitingniñ

Rezolütsıyası

Miting iştirakçileriniñ

Qırım Muhtar Cümhüriyeti

Yuqarı şurasınıñ reisi

A.P. Gritsenkoğa muracaatı

Ürmetli Anatoliy Pavloviç!

Biz- cemaat erbapları, iş ve oquv kollektivlerniñ temsilleri, medeniyet, tasil, aviatsıya hadimleri, yazıcılar, emek veteranları, UVC iştirakçileri, afgan cenkniñ veteranları, QMC yerli şuralar deputatları bu meydanda Sovetler Birliginiñ eki defa qaramanı, SSSRde nam qazanğan uçucı -sınavcı, Devlet mukãfatınıñ laureatı, Qırım Muhtar Cümhüriyetiniñ fahriy vatandaşı, 1971 senesi 1 fevralde facialı vefat etken Amethan Sultannıñ hatırasını añmaq içün toplaştıq.

İştirakçiler qırımtatar halqnıñ şanlı oğlunıñ hatırasını şereflediler, ‘Aqmescit’ Halqara aeroportına Sovetler Birliginiñ eki defa qaramanı Amethan Sultannıñ adını bermek teklifi ile QMC Yuqarı Şurasınıñ reisi A.P.Grintsenkoğa muracaat etken ‘Vatan qanatları’ adlı qırımtatar aviatorlarnıñ cemaat teşkilãtına tam şekilde qoltuttılar.

Dünyaca aeroportlarğa milliy qaramanlarınıñ adlarını bergen adeti mevcut. Ve bu anane vatandaşlarnıñ öz tarihına ürmetini numayış ete.

Efsaneviy uçucınıñ 90 yıllığı(25.10.1920)munasebeti ile keçirilecek merasimlerge azırlanuvnıñ çerçivesinde QMC Yuqarı Şurasına ‘Aqmescit’ halqara aeroportına Sovetler Birliginiñ eki defa qaramanı Amethan Sultannıñ adını berilmesi aqqında qararnı qabul etmege rica etemiz.

QMC, Aqmescit ş., Sovetler Birliginiñ eki defa qaramanı Amethan Sultan adına meydanında, 01.02.2010 qabul olundı.