www.avdet.org

Sayğılı zenaatdaşlar, Milliy Meclisniñ tasil ve maarif idaresi ve “Maaarifçi” birleşmesiniñ azaları adından epiñizni Ocalar künü ile can-yürekten hayırlap, alicenap işiñizde muvafaqyetler tileyim.
Ana-Vatan Qırımda 1989 senesinden berli tuvğan tilimizni canlandıruv meselesini ögüne maqsat etip qoyğan ve bu saada çalışqan mektep, aliy oquv yurtları ve diger oquv müessiseleri ocalarınıñ isseleri salmaqlıdır. Qırımtatar halqınıñ özgün medeniyetini ve milliy maarif sistemasını temelli tiklemek içün bugünki sıñırlı vaziyette qolay degil, amma oña baqmadan Qırımda sizlerniñ areketiñiznen milliy mektep ve sınıflar faaliyet köstermekte. Milliy maarif sistemamıznı tolusınen tiklemek içün, daa ziyade çalışmaq kerekmiz. Allah Taalâ bu saada niyetimizge yetmege yardımcı olsun!
Ulu atamız İsmail Gasprinskiyniñ “Biz kelirmiz ve ketermiz, amma milliy maarif ebediy yaşacaqtır...” degen qıymetli sözleri er vaqıt epimizge ilham berip, yolumıznı aydınlatsın.

Safure KACAMETOVA