www.avdet.org

Makedoniyada “Hid Bah Şen Fest” adlı XIX Halqara Festivali keçti. Adet üzre tedbir Çakarli köyünde ve Strumits şeerinde keçti. İlk defa festivalde “Uçan-Su” ve “Tañ yıldızı” (Qırım müendislik ve pedagogika universiteti) qırımtatar kollektivleri işitrak ettiler. Festivalde Zera Kencikayeva da öz yırlarını icra etti, onıñ yırlarını makedoniyalılar Çakarliniñ soqaqlarında yırlap yüre ediler. Bundan evel festivel tek balkan ülkeleriniñ temsilcilerini toplay edi.

Qırımtatar kollektivlerniñ çıqışları öz parlaqlıqları ile makedoniyalılarnıñ aqılında çoq vaqıtqa qalırlar. “Uçan-Su” ansambli icrasında “Haytarma” ve “Gügümler ile oyun” musafirlerni ayrette qaldırıp, çoq alğışalr qazandılar. Festival prezidenti Şenol Tahir qayd etti ki, Makedoniyanıñ türk cemiyeti büyük memnüniyet ile qırımtatar halqınıñ temsilcilerni qabul ete. Şenol Tahir haber etti ki, Makedoniya qırımtatar istidatlarını kelecek sene de bekley. Öz nevbetinde Makedoniyada türk cemyetiniñ temsilcileri qırımlılarğa makedoniya türklerini taqdim etmek içün yaqın zamanda Qırımnı ziyaret etmege ümüt eteler.

Malümat: Türkler makedoniyalılardan soñ Maedoniyanıñ üçünci etnik grupanı teşkil eteler: makedoniyalılar – 64%, albanlar – 25%, türkler – 4%, çingeneler – 3%, serbler – 2%, başqaları – 2%. Resmiy til – cenüp slavân tilleri gruppasına ait olğan makedon tilidir, bu tilde ealiniñ 70% laf ete. 21%dan çoq insan alban tilinde laf ete, bu til 2001 senesinden başlap albanlar toplu yaşağan yerlerde resmiy til statusını taşıy. Ealiniñ 3% türk, serb ve horvat tillerinde laf ete. “Hıdırlez Bahar Şenlik Festivali”niñ keçirilüv yılları devamında festival Makedoniyanıñ em türk cemiyetiniñ, em bütün ülkeniñ büyük medeniy tedbirine çevirilip, ülkeniñ medeniyeti ve tarihini taqdim etken uristik obyekti olaraq kösterile. Festival Makedoniyanıñ türk teşkilâtları birligi tarafından Makedoniya Cumhuriyetiniñ Medeniyet nazirligi, Türkiye Cumhuriyetiniñ Medeniyet e turizm nazirligi ve TİKA’nıñ qol tutuvı ile keçirile.