www.avdet.org

2010 senesi iyun 21 künü Qırımtatar Milliy Meclis reisi Mustafa Cemilev Norvegiya Qırallığınıñ Ukrainadaki Elçisi Oslav Berstadnı qabul etti.
Subet devamında körüşüv iştirakçileri qırımtatar halqınıñ içtimaiy-siyasiy ve medeniy vaziyetinen bağlı meselelerni muzakere ettiler. Hususan, elçi Meclis yolbaşçılığına yañ devlet yolbaşçısı ile birinci işbirlikniñ neticelerini ve ilerideki işbirlikniñ imkânlarını izaatlamaq ricası ile muracaatta bulundı.
Meclis Reisi ve onıñ birinci muavini Ukraina Prezidenti V.Yanukoviç ve Memuriyeti yolbaşçısınen birinci körüşüvlerini izaatlaraq, qırımtatar halqınıñ meseleleri çezilüvinde yanaşuvlar kösterilmesi noqtai nazarından emiyetli olğanlarını qayd ettiler.
“Bizim içün Ukraina Prezidenti yanında Qırımtatar halqı vekilleriniñ şurası işinde Ukraina Prezidentiniñ iştiragi pek müimdir, - devam etti Refat Çubarov. Ağımdaki seneniñ iyul ayında Ukraina Prezidenti Viktor Yanukoviçniñ Şuranıñ tolu terkibinen körüşüvi planlaştırıla, onıñ devamında, ümüt etkenimiz kibi, qırımtatarlar çezilmesini beklegen meseleler baqılacaq”.
Ondan da ğayrı, Meclis temsilcileri Norvegiya diplomatına haber ettiler ki, Devlet yolbaşçısınen subet devamında o, qırımtatar halqınıñ aq-uquqları tiklenüvine yonelgen qanunlarınıñ olmaması Ukrainada qırımtatarlarınıñ yerlemesi, integratsiyası, avdetinen bağlı bütün meselelerini tek ağırlaştırğanına diqqat etti. “Viktor Yanukoviçke bugün Ukrainanıñ Yuqarı Şurasında qayd olunğan qanun leyhasına qol tutmaq ricasınen bulundıq”, - dedi Refat Çubarov.
Dialog devamında onıñ işitrakçileri Ukraina akimiyetiniñ tış ve içki siyasetindeki müim teşebbüslerine dair fikir ve qıymet kesüvlerinen  paylaştılar, hususan, til siyaseti saasında, Rusiye Federatsiyasınıñ Qaradeñiz flotunıñ Aqyarda bulunma müddetiniñ devam etilmesidir.
Qırımtatar Milliy Meclis Reisi Mustafa Cemilev, Qırımdaki içtimaiy-siyasiy vaziyetine qıymet keserek, qırımtatarlarını qasevetlendirgen akimiyetniñ areketlerinde tafsilâtlıca toqtaldı. Hususan, musafirge qırımtatarlar temsilcileri sayısı eksilgen cumhuriyet akimiyeti organları aqqında tarif etti. “Künlerde öz vazifesini mesuliyetli ve yüksek seviyede becergen İslâm-Terek rayon devlet memuriyetiniñ yolbaşçısı Qadır Osmanov vazifeisnden boşatıldı. Bahçisaray rayon devlet memuriyetiniñ yolbaşçısı İlmi Umerovge dair qarar çıqarılması sozula. İdare saasında qırımtatarlarınıñ temsilcileri sayısınıñ eksilmesi ileride akimiyet ile munasebetlerimizde meseleler doğura bile”, - dedi M.Cemilev.
Körüşüv iştirakçileriniñ muzakere etken meseleler sırasında sürgün etilgen qırımtatarlarğa topraq berilmesi, ana tilinde tasilniñ tiklenilmesi ve qırımtatar halqı alanında demografik vaziyeti meseleleri de oldı.
 Norvegiya Qırallığınıñ Ukrainadaki Elçisi Oslav Berstad subetdeşlerni qırımtatar halqınıñ vaziyetini körmek imkânını bergen mündericeli dialog içün teşekkürini bildirdi. Oslav Berstad böyle körüşüvler sistemli olacağına ümütini bildirdi.
 

Qırımtatar Milliy Meclisniñ
Matbuat hızmeti