www.avdet.org

Qırımtatar Meclisiniñ delegatsıyası Litva tatarları cemiyetleri birliginiñ daveti ile Litvanı ziyaret etti. Beş kün devamında delegatsıya azaları belli litva siyasetçileri, cemaat erbapları, litva tarihçileri, etnolog ve siyasetşınaslar, huquqqoruyıcıları ile körüştiler, intervyüler berdiler, Grünvald uruşınıñ 600 yıllıq yubiley merasimlerinde iştirak ettiler.
Delegatsıya terkibine Meclis reisiniñ birinci muavini Refat Çubarov, tış bağlar bölüginiñ reisi Ali Hamzin, Kãtipliginiñ reisi Zair Smedlãyev. Vilnüs aeroportında delegatsıyanı Litva tatarları cemiyetler birliginiñ reisi Adas Yakubauskas. Ziyaret ketişatında Refat Çubarov «SLAPTAI» portalnıñ müdiri Gintaris Vısotskasqa bergen vidiointervyüde qırımtatar halqınıñ vaziyetinen bağlı bir sıra suallerini açıqladı.
Soñra Litva Cumhuriyetindeki Kazahstan elçiliginde Qırımtatar Meclis delegatsıyası Kazahstan Cumhuriyetiniñ fevqulade ve Vekãletli Elçisi Galımjan Koyşıbayevnen körüşti. Şunı qayd etmeli ki, Kazahstan elçiligi aynı zamanda Kazahstan devletini Latviya, Estoniya ve Finlãndiyada da taqdim ete.
Galımjan Koyşıbayevnen körüşüvniñ büyük qısmı qırımtatar meseleniñ çezilmesinde, şu cümleden qırımtatar halqınıñ haqları öz Vatanlarında tiklenilmesi, Ukrainada onıñ havfsızlığı ve inkişaf kefaletini temin etilmesi boyunca  OBSYEniñ Halqara forumında iştiragi oldı. Körüşüv iştirakçileri qırımtatarlarınıñ abadanlaşmalarında, şu cümleden, qırımtatarlar toplu yaşağan yerlerde mektepler qurulmasında iştiraginiñ usul ve imkãnlarını muzakere ettiler.
25 iyün künü delegatsıya belli litva siyasetçisi ve cemaat erbabı, professor Vitautas Landsbergisnen körüştiler. Sübet devamında Meclis vekilleri professornı qırımtatarlarınıñ zemaneviy vaziyetlerinen, Qırımda ve umumen Ukrianada içtimaiy-siyasiy vaziyeti ile tafsilãtlıca tanıştırıp, sübetdeşiniñ diqqatını qırımtatar meselesinde Avropa Birligi ve Avroparlament deputatlarınıñ rolüni arttırmaq zarurlığına celp ettiler.
‘ Qırımtatar halqınıñ haqlarını tiklemesine doğrutılğan mahsus qanunlarnı qabul etüviniñ sebepsiz uzatılması, sabıq sovetlerge ait memleketlerde yaqın zamanlarda yüz bergen facialı vaqialar bizni halqara teşkilãtlarınıñ, şu cümleden Avropa Birliginiñ iştiragi ile qırımtatar halqınıñ öz Vatanlarında haqlarını tiklenüvi, Ukrainada havfsızlığı ve inkişaf kefaletini teminlevi boyunca Halqara Forumnı keçirmek zarurlığında qandırdılar.’- dep qayd etti Refat Çubarov.

Professor Vitautas Landsbergis Avropa Birliginiñ inkişafı ve onıñ qomşu memleketleri, şu cümleden Ukrainanen munasebetleri boyunca öz fikirlerinen paylaştı: ‘Qırımtatar meselesini XX asır totalitar rejimler ve II Cihan Cenki devrinden kelip çıqqan çezilmegen problema olaraq qabul etmek zarurlığında şübhem yoq. Demek, AB qırımtatar halqınıñ taqdirine pervasız qalıp olamay,’-dep qayd etti Vitautas Landbergis. ‘Avroparlament deputatları Halqara forumnı keçirmek ğayesine qoltutuvlarına kelgende, mında eñ esası şu ki, siz avroparlamentariylerni qırımtatar meseleleri Ukrainada demokratiyanıñ şekillenmesine yardım etken tarzda çezilecegine qandırmalısız’.
26 iyünde Meclis delegatsıyası Rãyjay tatar köyüne yol aldı. Mında Grünvald uruşına 600 yıl tolğanı munasebeti ile Ulu Litov kinazı Vitautasnıñ şerefine abideniñ tantanalı açılışı olıp keçti. Litva tatarlarınıñ sermiyalarına tiklenilgen bu abide kollona ve onıñ töpesinde eki biri-birine pek oşağan temsil- tatar ‘taraq-tamğası’ ve litva ‘Gedimin direkleri’nden ibarettir.
Mında atlılar öz yigitligini, oq atuvlarında ve diger silãlarnen qullanuvında ustalığını numayiş etmeleri içün meydan quruldı. Kerçek, XV asır tatar atlılarnıñ arbiy ustalıqlarını numayş etken atlılar Poloniyadan keldiler. Meclis vekilleri olarnen Qırımğa kelmek ve arbiy- tarihiy klublarnıñ açılışında tecribe ile paylaşuv suallerini muzakere ettiler.
Bundan da  ğayrı, Meclis azaları Belorüsiye, Poloniya, Rüsiyeden kelgen diger musafirlernen bir sıra körüşüvler keçirdiler. Olarnıñ ketişatında eki taraflı meraq doğurğan bir sıra meseleler muzakere etildi. Böyle etip, Litva ve Poloniya müsülman liderleri- Mufti Tomaş Mişkeviç ve Mufti Romas Yakubauska Qırım Müsülmanları muftisi Emirali Ablayevniñ Belorüsiye, Litva, Qırım, Romanya ve Poloniya muftileriniñ muntazam şekilde körüşmek zarurlığını teşebbüssine qoltuttılar.
28 iyünde Qırım delegatsıyası ve Litva tatar cemiyetler birliginiñ reisi Adas Yakubauskas Litva radiosınıñ rus muarririyetine davet etildiler. Soñra ise Meclis azaları Litvanıñ belli ve nufuzlı siyasetçileri, Avroparlament deputatları Rolandas Paksas ve Yustas Paletskisnen  körüştiler. Avroparlament deputatları qırımtatar meseleni ögrenmek içün Qırımğa kelmek azır olğanını bildirdiler.
Ziyaretniñ soñunda Litva tatar cemiyetler birliginiñ reisi Delegatsiya yolbaşçısı Refat Çubarovğa Qırımtatar Meclis reisi adına resmiy mektübini teslim etti. Mezkür mektüpte Adas Yakubauskas Litva Cumhuriyetinde oña teklif etilgen qırımtatar Meclisiniñ daimiy vekli vazifesini eda etmege razı olğanını bildirdi.