www.avdet.org

Qırım Muhtar Cumhuriyeti Tasil ve ilim Nazirliginiñ reytingine köre, Eski Qırımdaki №2  mektep qırımtatar tilli umumtasil oquv yurtları arasında eñ güzel mektep olaraq tanıldı.
Qırım Muhtar Cumhuriyeti Tasil ve ilim Nazirliginde qırımtatar tilli umumtasil oquv yurtlarınıñ müdirleri içün toplaşuv keçirildi. Körüşüvniñ esas maqsadı- mekteplerde oquv –terbiyeviy esnasınıñ faaliyetine qıymet kesmek, neticeler çıqarmaq, 2009/2010 oquv yılına reytingni taqdim etmek ve yañı oquv yılına müim vazifelerini belgilemektir. Qırımtatar tilli 15 mektebiniñ müdirleri oquv yılınıñ neticelerine binaen öz yeñişleri ve yañı oquv yılına esas vazifelerinen paylaştılar.
Qırım Muhtar Cumhuriyetiniñ Tasil ve ilim Nazirligi qırımtatar tilinde tasil ile mekteplerniñ reytingini taqdim etti. Reyting malümatlarını azırlağanda nevbetteki maddelerge diqqat ayırıla edi: 9-11 sınıf talebeleriniñ qırımtatar tili ve edebiyatı ve oquv planınıñ diger fenleri boyunca Bütünukrain talebe olimpiadasında iştiraginiñ mahsuldarlığı, ilmiy-araştırma işler boyunca yarışında ğalipler olması; qırımtatar tilinde tasilli mektep ocalarınıñ ‘Yıl ocası’ Bütünukrain yarışınıñ cumhuriyet basamağında  iştiraklarınıñ mahsuldarlığı; ‘Tuvğan tilniñ qıymeti ölçülmez, halqnıñ maneviy variyeti ise tükenmezdir’ adlı qırımtatar tilinde talebeler icadınıñ VII Cumhuriyet festivalniñ iştirakçileri ve mükãfat saipleri olğanı. Reytingniñ birinci yerini Eski Qırımdaki №2 mektebi, ekinci yerini Büyük Onlardaki №3, üçünci yerini ise İçki №3 mektebi qazandılar. Umumen reytingte 14 mektep iştirak etti, bazıları bir yerni paylaştılar. Soñki 12 basamağında ise Zuyadaki №2  mektep turdı.
QMC tasil ve ilim naziriniñ muavini Ayder Ablãtipov mektepler pedagogika keñeşiniñ toplaşuvında reytingniñ neticelerini muzakere etmek ve qırımtatar tilinde tasilli oquv yurtunda oquv-terbiye ceryanınıñ iş sistemasını mukemelleştirilmesi içün iş planını işlemek, çeşit tedbirlerde iştiragi içün azırlavında talebeler ve ocalarnıñ işini faalleştirmek teklifini bildirdi.