www.avdet.org

A.Çiygözniñ fikrine köre, Zıncırlı medrese ve Svãto-Uspensk monastırge kirgende izinsiz başlanılğan qurucılıq kelecek yerli saylavlar arfesinde provokatsıyadan ğayrı bir şey sayılmaz.
2010 senesi 7 iyülde Bağçasarayda , Zıncırlı medrese ve Svãto-Uspensk monastır territoriyasına kirecekte yerleşken meydançıqta belli olmağan şahıslar izinsiz meydan qurucılığını başladılar. Şahıslarnıñ aytqanlarına köre, ellerinde Bağçasaray yerli akimiyetiniñ razılığı ve Svãto-Uspensk monastırnıñ avalesi bar.
Vaqialar olıp keçken yerge kelip çıqqan Bağçasaray şeer başı Dmitriy Kretov ve onıñ muavini Mihail Kazimirov qurucılıqnı şu daqqası toqtatılmasını talap ettiler. Amma şeer akimiyetiniñ emrine baqmadan belli olmağan bu şahıslar öz ‘belgisiz sımarıcılar’ınıñ vazifelerini yerine ketirmege devam ete ediler.
Tarihiy yadikãrlıqlar territoriyasında aqsız areketler yer alğanını bilip, Bağçasaray rayon devlet memuriyetiniñ yanında qırımtatar halqınıñ vekiller Keñeşiniñ azaları mezkür territoriyarı izinsiz elge alınmasına qarşı çıqıp, qurucılıq meydançıqnı dağıtmağa qarar berdiler.
Keñeşniñ reisi A. Çiygözniñ bildirgenine köre, 2010 senesi 10 iyülde Bağçasaray rayon devlet memuriyetiniñ reis muavini Gennadiy Mujdabayevniñ rehberligi altında Zıncırlı medrese ve Svãto-Uspensk monastır territoriyasında izinsiz qurucılığı boyunca toplaşuv keçirildi. Muşavere işinde Bağçasaray rayon devlet memuriyetiniñ yanında qırımtatar halqınıñ vekiller Keñeşiniñ azaları, Bağçasaray şeer ve rayon şurasınıñ deputatları, Bağçasaray mimarcılıq rayon bölüginiñ hadimleri, Bağçasaray tarihiy- medeniy qoruvınıñ vekilleri iştirak ettiler. Körüşüvde bulunğan Svãto-Uspensk monastırnıñ temsilleri mezkür qurucılıqqa iç bir munasebetleri olmağanı ve anda bir de bir işler keçirilgenine qarşı çıqqanlarını bildirdiler.
İmzalanılğan protokolğa binaen, muşavere iştirakçileri bu areketleriniñ sımarışçıları ve icracılarını belgilemek ricasınen huquqqoruyıcı organlarına muracaat etmege qarar berdiler.