www.avdet.org

Maña Eşref Şemyi-zade adına edebiyat mukâfatı berilgeni ve 80 yaşım toluvı munasebetinen bir çoq arqadaşlar, dostlar, tanışlar, oquyıcılar, mukâfat taqdimi merasimine kelgenler ve kelip olmağanlar, pek çoq insanlar ise telefon vastasınen hayırladılar. Olarnıñ episine gazeta vastasınen öz minnetdarlığımı bildirip, teşekkür arz etem. Ebet, bu nufuzlı mukâfat menim ögüme öz işlerimde, icadımda, areketlerimde daa mesuliyetli olmaq ve daa mahsuldar çalışmaq talabını qoya. Sağ olsun Eşref Şemyi-zade adına mukâfatnıñ tesisçisi Ebazer Emiraciyev ve onıñ “Can-yürekten” hayriye fondı. Ebazer bey bu yıl hususiy olaraq mukâfatnı 50000 grivnağa arttırır eken, men de onıñ yarısını yazıcılarmıznı nevbetnen regionlarğa alıp çıqmaq, er yerde muntazam sürette cemaatnen körüşüvler yapıp, ana tilini, edebiyatımıznı teşviqat etmege imkân doğurmaq maqsadınen kelişikli bir yengil maşina almaq içün tizilgen leyha boyunca toplanğan parağa qoşmağa söz berdim ve öyle de yaptım. Yani Ebazer Emiraciyevniñ yapqan hayriye işi, öz nevbetimde, maña da bu hayriye işini yapmağa imkân berdi. Men ondan biñ bir kere minnetdarım. Alla ondan razı olsun, onıñ kelirini biz biraz eksiltken olsaq, Alla qarşılığını qat-qat arttırıp bersin.
Sayğılı dostlar, epiñizden razım ve epiñizge bir daa can-yürekten teşekkür!

Riza Fazıl
Sürette: Riza Fazıl mükâfatnıñ yarısını yazıcılar birligine yengil maşina almaq içün berecegini ilân ete. Sağda – Ebazer Emiraciyev, solda – Dilâver Osman.

.