www.avdet.org

İslam – Allah tarafından Muhammed Peyğamberge (s.a.s.) indirilgen eñ soñki ve eñ mükemmel dindir. Quranda Allah insanğa bir sıra şartlar qoya, olarnıñ arasında – oraza. Allahnıñ bu şartını Muqaddes Ramazan ayında yapmaq kerek. Meraqlısı şunda ki, bu, Allahnıñ belgilegen yekâne ayıdır, daa bir kere onıñ emiyetligi qayd etile. Ramazan ayını tek oraza içün degil, bu ay on eki yıl devam etken Muqaddes Qurannıñ indirilmesi başlanıldı.
Bu ay er birimiz tek aş-suvdan degil, yaramay areketlerden de özümizni tutmaq kerekmiz, çünki bu ay biz Allahta musafirliktemiz. Ve eger biz birisine musafirlikke barsamız, özümizni yahşı alıp baramız, ketken soñ ev saiplerinde yahşı teesuratlar qalsın, dep. Daa bu ay Allah bizge öz sıñırsız rahmetniñ qapılarını aça, onı er bir qulı qazana bile. Bu ay, dua etip, biz Allahqa öz rahmetiniñ qapılarını daa keñiş açmağa rica etemiz, endi oraza bitkende ise onıñ imayetinde bulunamız. Bu ay er yahşı areket eyiliklernen mukâfatlana.

Onıñ içün tamam bu ay biz içün kelecekke bir nasiat olaraq olmalı, çünki biz yahşı şeylerni tek Ramazan ayı vaqtında degil, Allahnıñ rahmeti ile bizge berilgen ayatımıznıñ kelecek devirlerinde de yapmalımız. Öz yaşayışımıznıñ er daqiqasında, hususan Muqaddes ay vaqtında, biz fikirlerimiz ile bizni yaratqan Yaratıcımız aqqında olmalımız.
Allahtan kelgen Ramazan ayında olğan sınavlar aqqında çoq aytıla, tek bu ay degil, olarğa er vaqıt azır olmaq kerekmiz. Allahnıñ sınavı – insan içün eyiliktir, bu sınavdan keçkenlerni büyük mukâfat bekley. Allah bir de bir sınav yollacağını er vaqıt beklemek kerekmey. Ayatnıñ er añında er şeyni O içün yapmaq kerek ve er işniñ başında onıñ Muqaddes adını añmaq kerek, bunınen Allahqa inançnı qaviyleştirmek. Aytıla ki, dindar insannıñ imanı ne qadar küçlü olsa, o qadar çoq sınavlardan keçe. Allahnıñ er bir sınavından keçip, insan özüni mükemmel seviyege yaqınlaştıra, bunınen özüni Allahqa yaqınlaştıra. Onıñ içün Muqaddes Ramazan ayı – bu seviyege irişmek ve Ahiret künü Allah ögünde cennetke tüşmek ümütinen turmaq içün eñ yahşı vaqıt. Bu Ramazan ayı ve ilerideki aylar bizge em bu dünyada, em o bir dünyada eyilik ketirsin.