www.avdet.org

 Bismillâhir Rahmaanir Rahim!

Sayğılı müminler, aziz vatandaşlar!

İşte, on bir aynıñ sultanı Ramazan-ı şerifniñ soñuna yaqınlaşamız, bir qaç ünden soñ bir-birimizni mubarek Ramazan bayramınen hayırlacaqmız.

Bir ay zarfında farz olunğan orazalarmıznı tuttıq, terafih namazlarımıznı qıldıq,Quran oqup, hatimler yaptıq. Allı-taqatlı insanlarımız orazalılarğa iftar sofralarını donattılar. Bu yıli yaznıñ adden aşır sıcağına baqmadan, Allahnıñ emirini yerine ketirdik.

Ramazan bayramı – müsülmanlarnıñ ilki ve büyük bayramıdır. Bu bayram künleri oraza tutqanlar içün, umumen, bütün müsülmanlar içün quvanç ve sevinç künleridir. Ramazan bayramınıñ özüne has neşesi bar. Bayram arfesi ve bayram künü allı-taqatlı insanlar muhtaclarğa, yolcularğa, talebelerge fitir sadaqalarnı berirler, o insanlarnı da quvandırırlar. Ramazan bayramı arfesinde halqımız, adeti üzre, qoqular çıqarır, qomşularını, yaqın soy-aqrabalarına ikramlar eter. Bayramnıñ birinci künü, Bayram namazından soñ, büyüklerni ziyaret etmek, merhumlarnıñ qabirleri başında dualar oqumaq çoq güzel ananelerimizdendir.

Aziz mümünler! Cümleñizni keleyatqan bayramnen samimiy hayırlayım, sofralarıñızğa bereket, özleriñizge baht-saadet tileyim. Ramazan ayında eda etken ibadetleriñizni Allah Taalâ qabul ve maqbul eylesiñ. Amin!

Qırım müsülmanları Diniy idaresiniñ başı Emirali Ablayev

 -------------------------------------------------------------------------------------------------------------------------------------------------------

Allanıñ merametinde lâyıq olayıq

Sayğılı dindaşlar!

Er bir müsülman, yıl-yıldan, Ramazan ayında Allağa yaqınlaşmaq ve öz imanını peitmek imkânnı bula. Yıl-yıldan er biriñizniñ areketi ile Qırımnıñ oğurlı toprağına Allanıñ merameti enmekte: camiler açıla, medreseler çalışa başlay, islâm medeniyetine has olğan özgün ve unikal abideler tamirlene.

Biz, onyıllarnen devam etken sürügnlikte olğan evlâtlarını pek sağınğan Qırımnı ğayırdan tiklemege aşıqmaq kerekmiz.

Biz, Qırımnıñ bereketli toprağında biñlernen yıllar devamında ecdalarımız tarafından meydanğa ketirilgen maneviy baylaqnı kelecek nesil içün saqlamaq ve yetkizmek maqsadınen adden-aşır areketler yapmalımız.

Allağa işançımız ve imanımız qaviy olsa, ıntıluvlarımız birlik-beraberlikke esaslansa, öz toprağımız Qırımğa sadıq olur ekenmiz – eminim, biz er şeyni eñermiz.

Alla tutqan orazalarıñıznı, yapqan dualarıñıznı qabul etsin ve becergen hayriye em de eyi işleriñizden razı olsun!

Alla bizim doğmuş Qırım toprağımızğa tınçlıq ve barışlıq bağışlasın!

Oraza Bayramıñız hayırlı olsun!

Refat Çubarov,

Bütündünya qırımtatar Kongressiniñ prezidenti

 ------------------------------------------------------------------------------------------------------------------------------------------------

Aziz vatandaşlar!

Qıymetli Qırım müsülmanları!

Muqaddes Oraza-Bayram şerifiñiz mubarek olsun!

Halqımıznı birleştirgen, millet etken haq dinimiz, güzel tilimiz, saf Vatan sevgisi olğanını epimiz yahşı bilemiz. Bu bizim büyük qıymetliklerimiz, samimiy is-duyğularımız bizni millet olaraq qorçaladı, saqladı, bizim küç-ğayretimizni, ümütlerimizni arttırıp keldi, yekâne ve tekrarlanamız Yurtumızğa qavuştırdı. Onıñ saibi olması, aq-uquqlarımıznıñ tiklenilmesi, şu cümleden, halqımıznıñ kütleviy areketine, ıntıluvlarına da bağlı.

Bu sebepten ve bu yonelişleirmizde Alla-Taalâ birlik-beraberligimizni qaviyleştirsin, işlerimizniñ faalleşmesi, ileirlemesi oğrunda taqat ve sabır bağışlasın, Ana-Vatanda imanlı, serbest, sağlam, yüksek ruhlu ve evlâtlarımıznıñ ferağını körüp yaşamaq qısmet etsin!

Qırımtatar Milliy Meclisi