www.avdet.org

Sayğılı dostlar!
Bugün, eyecan ve qasevetler biraz söngen soñ, men olıp keçkenlerge dair öz fikirimni samimiyliknen bildirmege ister edim. ‘Yevrovideniye-2011’ yarışına saylav turunda iştirak etkenime iç peşman degilim. Rey berüvniñ neticeleri er kesge bellidir. Birinci yerine nail olğan iştirakçige nisbeten menim namzetime üç kere ziyade rey bergenleri içün ğayet bahtlım. Maña inanğanlar ve qoltutqanlarğa soñsuz minnetdarım. Menim içün siziñ işançıñız- eñ esasıdır. Ayrı şahıslarnıñ ambitsıyaları, oyunlarınen iç bir munasebette bulunmağa istegim yoq.
Şimdi daa bir ‘saylav’ ilãn etildi. Buni yapayatqan insanlar öz aqlığını isbat etmek ve tekrar meni ve diger artistlerni aqaretlemek içün elinden kelgenini yapacaqlarına eminim. Olarnıñ diger yolu olmağanını añlayım. İnsanlar menim içün rey bergenlerini tanısalar bile, üstüme kir tökmek içün er şey yapa bilirler.
26 fevral künü keçirilgen saylavlarnıñ neticeleri çıqarılğan soñ men ve komandamnıñ vekilleri teşkilãtçılarğa iç bir itiraz bildirmedik. İleride de izaatlarımız olmaycaq, çünki er şey öyle de añlaşıla.
Men özüm içün, yengil olmasa da, bir qarar aldım- tek qoşma para qazanmaq maqsadınen yapılğan tekrar saylavlardamı, çeşit qalabalıqlardamı iştirak etmemek.
Meni ğalip olaraq körmege istegen mühlislerden can -yürekten afu sorayım, amma bu kibi işlerde iştirak etmek- öz -özüni coymaq demektir. Men tek özüm inanğan şeylerni yapa bilem. Menim muzıkamnı sevgenlerni quvandırsam -ondan da yahşı şey barmı! Buna ise men sizge söz berem!!
Destegiñiz ve meni añlağanıñız içün daa bir kere çoq sağ oluñız
‘Yevrovideniye-2011’ yarışında Ukrainanı taqdim etecek artistlerge muvafaqiyetler tileyim ve er kesni bahar ile hayırlayım!
Sevgi ve ürmet ile siziñ Camalañız!
01.03.2011


Bu mektüpten soñ matbuatta Zlata Ogneviç temsilcileri yırcı ayağını yaralağanı aqqında bildirdiler. ‘Bu sebepten, bağışlarsız, amma martnıñ ortasına qadar çıqışlar olmaz. Elbette, biz Zlatanıñ ‘Yevrovideniye-2011’ yarışına tekrar saylavlarında iştirakı aqqında da söz yürsetip olamaymız.’
Böyle etip, Yevrovideniyede Ukrainanı Mika Nyüton taqdim etecek.