www.avdet.org

Bir zamanda bar eken, bir zamanda yoq eken, bir ‘professional ruslar’ yaşay eken, olar Qırımnıñ siyaset çarlığında adiy bir mahlüqlar eken. Şu ‘professional’lar yarımadada ‘rus’ ğayesini tarqatıp, yağmurdan soñ mantarlar kibi biri-biriniñ artından ösip çıqa eken. Olar Qırımda rus medeniyetiniñ inkişafı oğrunda bir şey yapmayıp, tek özlerini tanıttırmaqnen oğraşa ve siyasiy minberler, nezaretleri altında olğan kütleviy haber vastalarınıdan arqalı Qırımdaki rus halqına qırımtatar ve ukrainlerge qarşı nefret doğurmağa tırışa edi. Olar adamlarnı er vaqıt olmaycaq şeylernen qorquzıp, bu qorqu ile alçaq, şovinistik duyğularğa yol bere ve bunıñ ile özlerine rey qazana edi.
Ana saña qasevet!
Amma bir daqqa terence tüşünsek, bu ‘qaramanlar’nıñ rus halqınıñ meselerini çezmek niyeti bile yoq olğanı açıq-aydın körünir. Artıq onlarnen yıl keçti, olar ise alâ rus tiliniñ aşşalamasını toqtatmaq, onı resmiyleştirmek, topraq meselesi ve diger Yeşil ada içün müim olğan problemlerni çezmege söz bermekte. Amma yazıq ki, bir şey yapılmadı. Bu ‘professional’larnıñ akimiyet organlarında temsilciligini közge alsaq, añılğan meselerniñ çezüvi pek ağır olmasa kerek. Amma olar çezilse, oñaytlı şiarlar ve elektorattan marum qalınacaqda. Aysa, Qırımlılarğa barış ne kerek, barem biri-birini nefret etsinler...
Amma şusı meraqlı ki, ‘professional’lar, olar nefret etken qırımtatarlar öz aqlarını qorçalavında belli bir neticelerge irişken ve bunıñ ile muhtariyetniñ qalğan sakinlerine güzel örnek köstergen soñ bayağı faal qıbırdamağa başladı.
Mına misal olaraq, qırımtatarlar topraq meselesini çezmege başladı. ‘Narazılıq alanlarını’ teşkil etmege, vesiqalarını toplamağa, mitingler keçirmege, isbat etmege başladı.’Ne güzel!’ - dep tüşündi ruslar ve ‘professionallar’dan yardım beklemege ep bir boşuna olğanını añlap, özleri qırımtatarlarğa qoşuldılar. Ruslar, qırımtatarlar, ukrainler topraq meselesini beraber çezmege tırışmağa başladı. Aman-aman er bir ‘alanda’ ‘slavân evçikleri’ peyda olmağa başlandı, topraqnen bağlı er bir mitingte qırımtatarlarnen yan-yanağa ruslar tura ediler.
‘Professional’lar bu şeyge baqıp, şaşıp qaldılar. Qırımtatarlar ve ruslar beraber ve dostane müitte bir meseleni çezmektelermi? Ve ‘Yoq, öyle olmaz! Ruslar qırımtatarlarnen dost olmamaq kerek. Barem daa bizni unutırlar.’ dep tüşündiler. Ve öz qara işine tutundılar. ‘Rus evçikler’den yürip, qırımtatarlarnen dostlaşmağa mümkün olmağanını tasdıqlamağa başladılar. Adamlarnı qorquza-qorquza, mına, biz qırımtatarlarnı mından quvarmız da, bütün topraqlarnı elimizge alırmız dep, söz bere ediler. Aynı şu zamanda, nezaretlerinde bulunğan kütleviy haber vastaları mitinglerde slavânlarnıñ iştirakini közge almayıp, qırımtatarlarnı qanunlarını bozğanlarında qabaatlay edi. Ne yazıq, amma bazıları buña inandılar. Bunıñ misali, Aqmescit rayonı Saraylı Qıyat (Mirnoye) köyüdir. Bir de güzel başladılar, alanlarnı beraber teşkil ettiler, beraber de nevbet ettiler, atta yañı qasabanı Birlik - yani qırımtatarlar ve slavânlarnıñ birlikte yaşağan qasabası dep adlandırdılar. Amma,‘professional’lar bunı begenmediler. Olar ‘slavân evçikler’niñ yolbaşçılarnı öz tarafına qandırdılar ve er şey dağılmağa başladı. Ondan da ğayrı, Saraylı Qıyat yerini öyle bir begendiler ki, mında yavaş-yavaş qırımtatarlarğa hıyanetlik yapıp, milletara müitini bozmağa başladılar.
Olarda er şey adamcasına degil! Qırımtatarlar qırımtatar ve rus tilleriniñ Qırımda resmiyleştirilüvini talap etmege başladılar. Rus halqı buña razı olıp, destegini köstere, ‘professional’lar ise inatcasına buña qarşı.
İşte, bu masalnıñ soñu böyle edi: halq bu saçma-sapanlıqtan bezip, ‘yeter artıq, bezdik, qayğıruv ve itinañızğa toydıq. Sizsiz de çare taparmız, qırımtatarlar, ukrainler, başqalarınen beraber öz problemlerimizni çezermiz. Qaç yıl artıq, qara yüzleriñizden başqa bir şey körmedik, olar ise merametli qomşu, yahşı, sadıq dostlardır! Aydı, defin oluñ..!’ - dediler
Eh, masal kerçek olsaydı...

İsmet Arif