www.avdet.org

2011 senesi 10 yanvar künü qırımtatar halqınıñ ulu oğlu, Qırımnıñ büyük vatanperveri, cemaat erbabı, “Emel” dergisiniñ tesisçisi ve naşiri Mustecip Ülküsalnıñ vefat etkenine 15 yıl oldı.
Öz şahsiy misalinen, ayatı ve faaliyetinen bütün dünyağa Vatan nasıl etip sevilecegini köstergen insannıñ hatırasını ebediyleştirmek maqsadı ile, İstambul şeeriniñ (Türkiye) Qırımtatarlar medeniye ve yardımlaşma dernegi ve “Maarifçi” birleşmesi “MÜSTECİP ÜLKÜSALNIÑ HATIRASINA YARIŞ”nı ilân ete. Bu yarış Qırımnıñ mektep talebeleri ve studentler arasında eki nominatsiya boyunca keçirilecek – “eñ yahşı resim” ve “eñ yahşı inşa”.
5-9 sınıf talebeleri arasında eñ yahşı resim yarışı “Vetanım – Qırım” mevzu boyunca keçirilecek. (Resimniñ ölçüsi - 55Х40, akvarel. Resim yanındaki yazılar latin grafikasında olmalılar).
Studentler arasında inşa yarışınıñ mevzusı: “Öz halqına hızmet etkenler unutulmazlar!” (4 saife, A-4 kâğıtta. İnşa qırımtatar tilinde, latin graikasınen).
Er nominatsiyada ğalebe qazanğanlarğa Dernek tarafından, reisi Celâl İçten, mukâfatlar berilecek: 1 yer – Türkiyege kezinti, ekinci- 150 USD, üçünci – 100 USD.
  İşler (poçta ile ola bile) 2011 senesi 1 mayiske qadar “Maarfiçi” birleşmesinde qabul olunalar: V.Vernadskiy adına pr., 143, 3 kv., Aqmescit ş., 95007.

MALÜMAT. MÜSTECİP ÜLKÜSAL (1899-1996) – qırımtatar cemaat erbabı, “Emel” dergisiniñ tesisçisi ve naşiri.
Müstecip Ülküsalnıñ ecdatları XIX asırnıñ ortasında Qrımdan çıqıp, Romaniyanıñ Dobrucasında yerleşeler. Anda, Azaplar köyünde, Müstecip de dünyağa kele, tasilini Romaniya ve Türkiyede ala.
1917 senesi Müstecip Ülküsal Qırımda Qurultay şekillengenini bile. O ve daa 30 arqadaşı Qırımğa ketmek qararına keleler. Amma akimiyet qarşı çıqa, çetel pasportlarnı bermeyler. Amma buna baqmadan Müstecip Ülküsal Vatanına kete, lâkin gemiden tüşkende, Aqyarda onı apiske alalar. Bir qaç vaqıttan soñ Qurultay azası Sadık Kaytaz-oğlunıñ ricası ile Müstecip Ülküsalnı azat eteler, ve eki yıl devamında o, Fotisala köyünde ocalıq yapa.
Rusiyede vatandaş cenki başlanğan soñ, Müstecip Ülküsal Romaniyağa qayta, anda Budapeştte universitetke uquq fakültetine oqumağa kire. Anda o ve 22 vatandaşı “Tonğuç” medeniy merkezini teşkil eteler. 1930 sensinden ise “Emel” dergisini çıqarmağa başlaylar, birinci sanı dünya yüzüni 1 yanvar künü köre. “Emel” dergisi hadimleriniñ istekleri ile Müstecip Ülküsal onıñ baş muarriri ola.
1933 senesi 23 aprel künü Müstecip Ülküsalnıñ yolbaşçılığında “Emel” dergisiniñ hadimleri Kostencede büyük toplaşuv keçireler, anda Cafer Seydamet “İsmail Gasprinskiy ve “Terciman” adlı tarihiy maruzasını oquy. “Emel” dergisiniñ teşebbüsi ile Dobrucada Qırım milliy sanat künlerini keçirile. Müstecip Ülküsal arqadaşlarnen beraber “Türk Medeniy Birligi” cemiyetini quralar ve 1934 senesi 29 mayıs künü Qurultay keçireler. Onıñ reisi vazifesine Müstecip Ülküsal tayin etile. “Türk Medeniy Birligi” Qurultayından soñ Müstecip Ülküsal bütünley qırımtatar milletiniñ işlerine dala.
1996 senesi 10 yanvar künü İstanbulda vefat ete.

QHA