www.avdet.org

Qırımtatar ğalebelerniñ yañı dalğası Camaladan (Susanna Camaladinova) başlandı. Solo kontsertlerde Camala 16 yaşından başlap iştirak ete. Qız oquv yurtunıñ opera vokalı sınfında, soñ ise Kiyevdeki muzıka akademiyasında oqudı. Camala bir çoq kere İtaliyada çeşit yarış ve festivallerde iştirak etti, 2007 senesinden başlap ise ‘Pa’ müzikliniñ solisti oldı.

Parlaq, özgün yırcı, seyirciler ve jüri azalarını öz fevqulade sesinen ayrette qaldırıp, bütün ‘Yañı dalğa’nı şaşırttı. Camala öz yırını icra etkende bütün zal el çırpmalarnen çıñladı. İndoneziyadan kelgen ve Camalanen birinci yerni paylaşqan Sandi Sondora Camalanıñ sesine aşıq olğanını gizlemedi. Keñiş diapazonlı unikal sesiniñ saibi şimdi albomnıñ çıqarılmasına azırlana.

Halq yıldızı - Zera Keracıyeva

‘Böyle qadınlarnen bizni iç bir buhran (krizis) qorquzmaz’. Böyle sözler ile Yuriy Rıbçinskiy ‘Halq Yıldızı’ adlı yarışta Zera Keracıyeva ve Yevgeniya Vlasovanıñ çıqışını izaatladı. Ukrain estrada yırı tesisçiniñ atta közleri yaşlandı.
Mezkür yarış acayip bir istidatnı açtı. Konkursnıñ şartları sade - öz muzıkal istidadını köster ve ‘halq yıldızı’ ol. Yarışnıñ iştirakçileri - 10 çift kişi. Çiftler belli estrada icracılar ve kastingde halq arasından saylanılğan icracılardan ibarettir.
40 yaşlı Zare Keracıyeva diñleyicini körip olamay, amma onıñ energetikasını er vaqıt duya. Zera közleri körmegenler içün mahsus mektepte oqudı. Balalığından başlap, bütün kontsert ve tedbirlerde faal iştirak ete edi. Zera daa çoq lirik yırlarını seve. ‘Halq yıldızı’ yarışında da Zera belli yırcı Yevgeniya Vlasovanen beraber pek tesirli lirik yırını icra etip, kimseni pervasız qaldırmadılar. Barbara Brılska Zeranıñ çıqışını diñlegen soñ, ‘Siz eñ güzelsiz, menim baalarım da yetmez’ - dedi.

‘Şüret daqqası’ konkursında qırımtatar istidatları

Aqşeyh rayonı Fraydorf (Novoselovskoye) qasabasından kelgen ‘Gençlik’ dareçiler taqımı Ukraina istidatları cedveline kirip, Rusiyede de ‘Şüret daqqasını’ yaşamaqta. Daa yaqında balalar ‘Ukrainanıñ istidatları bar!’ adlı yarışta er kesni ayrette qaldırdılar. Bugün ise Rusiyeniñ birinci kanalı taqımnı ‘Şüret daqqası’ yarışında iştirak etmege davet etti. ‘Gençlik’niñ reberi Eskender Velilâyev 2006 senesi istidatlı oğlan ve qızçıqlarnı topladı, dümbeleklerni öz qolarınen yasadı, qırımtatar halq avalarını saylap aldı. Bundan soñ ise sarsılmaz ğayret, ağır repetitsiyalar, qollardaki nasırlar ve ellerniñ uyuşıp qalması, amma buña baqmadan, kene de repetitsiyalar ve repetitsiyalar başladı. İşte, darecilerimiz içün ‘Şüret daqqası’ nenen bitecegi şimdilik belli degil.
‘Gençlik’ sanada köstergen şeylerni tasvir etmege pek ağır. Darege urğan parmaqlarnıñ tüzgün sesleri, şeñ nağmeler, yigitlerniñ beraberlikte aytılğan ‘gey’ davuşları tılsımlı şekilde tesir ete: dümbeleklerniñ sesleri yüreklerimizde akis-sedasını tapa. 


Sevil Memetova ‘Yıldızlı Qırımnı’ fetih etti.

‘Slavân halqalarnıñ sanat forumı’nı 19 yaşındaki Sevil Memetova fetih etti. Yaş yırcımız ‘Vokal-solo’ nominatsiyasında Gran-Prini qazandı. Bundan da ğayrı, ‘Vokal ansambller’ nominatsiyasında ‘Belbek’ vokal ansambli eñ güzel dep tanıldı. Bundan soñ, Sevil ‘Yıldızlı Qırım’ adlı halqara festivalinde ğalip çıqtı.