Mustafa Cemil bir afta devamında Türkiyede bulundı.
Pzt, 10/19/2009 - 15:50 | Redaktor
2009 senesi oktâbrniñ 10-15-ine qadar Qırımtatar Milliy Meclisi reisi, Ukraina halq deputatı Mustafa Cemil Türkiyede bulundı. Ziyaret devamında Mustafa Cemil Türkiyeniñ çeşit şeerlerniñ yerli akimiyetler vekilleri, qırımtatar dernekleriniñ azaları, bir sıra universitetlerniñ ocaları ile körüşti.
Ziyaretniñ ilk künü M.Cemil Gebze ve Kocaeli şeerlerindeki qırımtatar yardımlaşma ve medeniyet cemiyetlerinde bulundı, yerli qırımtatarlarınen körüşti.
Oktâbrniñ 11-de M. Cemil Kocaeli şeerinde teşkil olunğan Pazar Kahvaltısında iştirak etken soñ, Kocaelideki qırımtatar yardımlaşma ve medeniyet cemiyeti tarafından İzmit şeerinde tiklenilgen meşur maarifçimiz İsmail Gasprinskiyniñ abidesini ziyaret etti.
Oktâbrniñ 12-sinde ise Qırım delegatsiyası Eskişehir şeerindeki Osmangazı universitetinde bulunıp, anda keçirilgen qırımtatar tiliniñ problemleri boyunca halqara simpoziumda iştirak etti. Simpozium ketişatında Mustafa Cemil Fahriy doktor unvanı ile taqdirlendi. Aynı şu kününiñ aqşamında Eskişehirde Mustafa Cemilniñ adını taşıycaq Qırımtatar Medeniyet evi açıldı. Eskişehirniñ valisi Mehned Kılıçdar öz nutqunda Eskişehirde 100 biñden ziyade olğan qırımtatarlar şeerniñ medeniy degeri sayıla dep qayd etti.
Oktâbrniñ 14-de Polatlı şeerini ziyaretinden soñ M.Cemil Ankara şeerinde Türkiyeniñ qırımtatar yardımlaşma ve medeniyet cemiyetlerniñ baş reisi sayğılı Ahmed İhsan Qırımlı ile körüşti.
QHA
u.alyadinova@mail.ru.