www.avdet.org

Belli olğanı kibi, Qırımtatar Milliy Meclisniñ faaliyetiniñ esas şekillerinden biri vatandaşlarnen teşkil etilgen körüşüvlerdir.
Qırımatatar Milliy Meclisniñ yolbaşçıları ve azaları vatandaşlarnıñ yaşağan yerlerinde teşkil etilgen toplaşuvlarda daima iştirak eteler, olarnıñ devamında cemaat ögünde açıq-açıqtan toplaşuv iştirakçileri tarafından köterilgen sualler baqılalar.
Ağımdaki seneniñ üç ayı devamında Meclisniñ yolbaşçıları ve azaları, Qurultaynıñ Revizion komissiyasınıñ azaları Qırımnıñ Aluşta, Qarasuvbazar, Canköy, Yedi-Quyu, Aq-Şeyh, Aqmescit, Sudaq, Aq-Meçet rayonlarınıñ, Herson vilâyetiniñ onlarnen köy ve qasabalarını ziyaret ettiler. Anda vatandaşlarnen toplaşuvlar, yerli meclislerniñ faal azalarınen körüşüvler ve seminarlar, ocalar ile muşevereler keçirdiler. Bu toplaşuvlarda Qırımnıñ farqlı regionlarında yaşağan biñlernen qırımatatar faal iştirak ettiler.
Adet üzre, Meclis azalarınen beraber böyle tedbirlerde yerli şuralarnıñ rutbeli şahısları, em de icra akimiyetiniñ cumhuriyet qurumlarınıñ vekilleri iştirak eteler, böyle etip, insanlarınıñ meselelerini daa da effektiv baqılalar ve çezilüv yollarını tapalar.
Em de er çarşembe künü Qırımtatar Milliy Meclisniñ merkeziy ofisinde vatandaşalr olarnı raatsızlağan içtimaiy ve şahsiy sualler boyunca qabul etileler. Ayrı qabul künleri Meclisniñ azaları ve hadimleri 60-80 vatandaşnı qabul eteler.
Kerek olğanda qırımtatar kollektivleri ve müessiseleri, içtimaiy teşkilâtlarnıñ yolbaşçılarınen körüşüvler keçirile.
Qırımda ve onıñ sıñırlarından tış keçirilgen tedbirlerde (tögerek masalar, seminarlar, konferentsiyalar) qırımtatar meselesi muzakere etilse, Meclis tarafından alimler, ekspertler, cemaat erbapları yollanılalar.
Qırımtatar Milliy Meclisniñ bütün faaliyeti kütleviy informatsion vastalarında aydınlatıla.
Aynı vaqıtta, belki, vatandaşlarımız içün yaşağan yerlerinde keçirilgen körüşüvlerden ğayrı, fikirdeşler arasında öz fikirler ve ğayelerini bildirmek daa da uyğun olur.
Bu maqsad ile 2011 senesi 14 aprel künü Aqmescitte Qırımtatar muzıkalı-draam teatrinde (Mendeleyeva soq., 5) Qırımtatar Milliy Meclis Reisi, Ukraina halq deputatı Mustafa Cemilev, onıñ muavinleri – Qırım Yuqarı Şurasınıñ deputatları Refat Çubarov, Remzi İlyasov, Bahçisaray rayon şurasınıñ deputatı Ahtem Çiygöz, Qırımtatar Milliy Meclisniñ başqa azaları qırımtatar içitmaiy teşkilâtlarnıñ vekillerinen ve istegen vatandaşlarnen körüşecekler.
Körüşüv saat 11’de başlanacaq. Kiriş serbest.