www.avdet.org

Qırım müsülmanlarınıñ diniy idaresi (QMDİ) Aqmescitte Büyük Cuma Cami kompleksiniñ eskiz leyhasınıñ mimarcılıq konkursını ilân etti. Bu aqqında 22 iyun künü matbuat konferentsiyasında QMDİ Müftisiniñ muavini Ayder İsmailov tarif etti.
İsmailov haber etkeni kibi, ağımdaki seneniñ 17 iyun künü QMDİ Cuma Cami qurucılığı içün topraqqa aqnı bergen vesiqalarnı aldı. Böyleliknen, qurucılıqnı başlamaq içün bütün vesiqalar azırlanğan soñ, QMDİ nevbetteki basamaqqa keçti – Cuma Caminiñ eñ yahşı leyhasına konkurs ilân ete.
Konkursta Ukraina ve başqa ülkelerden mutehassıslar, müellif kollektivleri, uquq ve fizik şahıslar iştirak ete bileler, yaş sıñırı yoq. “QMDİ, konkursnıñ programması ve şartları çerçivesinde sımarışçı olaraq, öyle maqsad qoya – konkurs yarışı şaraitlerinde Cuma Cami kompleksiniñ eñ yahşı eskiz leyhasını elde etmek”, dedi A.İsmailov.
Onıñ malümatlarına köre, leyhalar konkursında iştirak etmek içün, QMDİ’ne yazılı arizanı yollamaq kerek, anda mimar ya da teşkilât aqqında malümatni bildirmek kerek. Konkurs qapalı, yani vesiqalar teslim etilgende, adlar belli olmayıp, leyhalarğa şifrler berilecek.
“Konkurs 23 iyun künü başlanıp, 23 avgustqa qadar devam etecek. 1 sentâbrge qadar konkursta iştirak etken leyhalar muzakere etilip, 10 sentâbrde konkursnıñ neticeleri ilân etilecekler. Konkurs ğaliplerine para mukâfatları berilecek: birinci yer – 8000 grn, ekinci – 6000, üçünci – 4000 grn”, - qayd etti A.İsmailov.
Ğaliplerni QMDİ yanında mahsus tizilgen nezaret keñeşi belgilecek. Konkursnıñ ğalibi leyha-smeta vesiqalarnıñ işletilmesinde iştirak ete bilecek ve ğayeniñ saqlanılması içün qurucılıq işlerinde müellif nezaretini yapa bilecek.
Leyhanıñ tehnik vazifesi ilân etilmey, onı tek konkurs iştirakçileri alacaqlar. “Caminiñ qubbesi, dört minaresi olmalı, namaz zalı 4 biñ insannı sığdırmalı. Komplekste biz cami binasını, Müftiyatnıñ memuriyet binasını körmege isteymiz, - tehnik planları aqqında haber etti QMDİ hadimi cemil Bibişev. – Kompleksniñ territoriyası abadanlaştırılğan olmalı, yeşillik şellâleler, küçük mimarcılıq şekilleri, parkovka, qavehane ve köşükler olmalı. Em de qaravul hızmeti içün eki bina olmalı”.
Büyük Cuma Cami kompleksiniñ qurucılığını kelecek sene başlamağa planlaştıralar. İnvestorlar qıdıruvı boyunca iş endi alıp barıla. Ondan da ğayrı, er istegen insan QMDİ esabıne para keçirip, Cuma Cami qurucılığına öz issesini qoşa bile.

Elmara MUSTAFA