www.avdet.org

Къырымтатар халкъы Миллий Меджлиси иле Якын Догу университети (Къыбрыс Якъындогъу Университети) арасында имзалангъан ильмий, техникий ве тасилий мунасебетлерни юрютиш анълашмасы эсасында эр йыл 3 къырымтатар генчи бу университетке окъумакъ ичюн ёлланыладжакъ. Бу иш башлангъанына 2 сене олды. Бугуньки куньде Къыбрыста Левкоша шеэринде ерлешкен бу университетте 5 генчимиз магистратурада талим алмакъта.
Тарафларджа къабул этильгенине коре, Къыбрыс Якъындогъу Университетинде окъумакъ истеген абитуриент ашагъыдаки шартларгъа уймалы:
1. Университет мезунынынъ дипломы ве дипломнынъ илявесинде орталама балл 4 иле 5 арасында олмалы.
2. Абитуриент къырымтатарджа сербест къонушмалы.
3. Абитуриент инглиз дилини бильмели.
4. Абитуриент, чешитли миллий/регионал ве я ерель олимпиадларда грамота/сертификат/такъдирнаме къазангъан бир генч олмалы
5. Абитуриент, бир де бир конкурс ве я ярышмаларнынъ гъалиби/призеры олмалы.
6. Абитуриент сечимден кечмели.
Къыбрыс Якъындогъу Университетине кириш ичюн тарафларджа къабул этильген весикъалар шулар:
1. Ариза
2. Университетнинъ дипломы ве илявесининъ инглизджеге нотариаль терджимелерининъ копиялары.
3. Украина ватандашы паспортынынъ копиясы
4. Четэль паспортынынъ копиясы
5. 4 фоторесим (3х4)
6. Олимпиада/конкурсларда къазанылгъан диплом/грамоталарнынъ копиялары.
Весикъалар "Маарифчи" Ассоциациясынынъ офисинде август 10 кунюне къадар саат 10.00-15.00 арасында къабул этиледжек.
Адрес: Акъмесджит шеэри, Вернадский джаддеси (эвельки Ялтинская сокъагъы), 143, кв. 3. Троллейбуслар: № 4, 6 "Университет" дурагъы.