www.avdet.org

2009 senesi noyabrniñ 3-nde ‘Shen’ ticaret merkeziniñ salonında Türkiye Cumhuriyetini ilân etilmesiniñ 85 yıllığı munasebeti ile Aqmescitte Türkiye Cumhuriyetiniñ konsulı Seyran Osmanovnıñ tarafından teşkil etilgen tantanalı merasim olıp keçti.
Tedbirde Türkiye Cumhuriyetiniñ Odessadaki baş konsulı Murat Tamer, Milliy Meclis reisiniñ birinci muavini Refat Çubar, Milliy Meclis reisiniñ muavini Remzi İlyas, Qırım akimiyetiniñ, TİKAnıñ vekilleri, sanat ve medeniyet erbapları, milliy areketniñ veteranları ve digerleri iştirak etti.
Murat Tamer, Qırımda Türkiye Cumhuriyetiniñ meydanğa ketirilüvini qayd etilmesini teşkil etkenleri içün Seyran Osmanovğa minnetdarlıqlarını bildirip, salonda ömürlerini qırımtatar halqınıñ vatanına qaytuvları oğrunda sarf etken adamlar bulunğanını qayt etti ve olarğa bu müim küreşte muvafaqiyetler tiledi.

Refat Çubarov ise, öz nevbetinde hayırlav sözlerinden soñ, Türkiyeniñ prezidenti Suleyman Demirel Qırımtatarlar, Ukraina ve Türkiye arasında dostane munasebetlerini qurmaq içün bir köpürdir dep, qayd etkenini hatırlattı ve ‘Ukraina Türkiyenen beraberlikte Avropa Birligine kirse, qırımtatarlarnıñ meseleleri çezilir’ degen fikirni bildirdi.
Malümat: Türkiye Cumhuriyeti Birinci Cian cenkinden soñ Osmanlı Devletiniñ yerine meydanğa keldi. Mustaqilligini coymaq havfı türklerni öz vatanını qorçalamaq içün ellerine silâ aldırttı. Küreşniñ yolbaşçısı istidatlı asker ve siyasetçi Mustafa Kemal oldı. Öz faziletleri, yeñişleri sayesinde Atatürk soyadına nail oldı ve bu soyadı ile bütün dünyağa belli oldı. Mustafa Kemal yañı parlament - Türkiyeniñ Ulu Milliy Meclisiniñ reisi olaraq saylandı, ondan da ğayrı, yañı milliy devletniñ qurulmasına doğrulğan inqilâpnıñ başında turdı. Atatürk 1923 senesi oktâbrniñ 29-ında ilân etilgen Türkiye Cumhuriyetiniñ ilk prezidentı olaraq da tarihqa kirdi.