www.avdet.org

“İ.Gasprinskiy adına QK” QCM hadimleri Muaradasilova Fera-hanımğa elyazma ve arhiv vesiqalar bölügine Ulu Vatan cenki veteranı, milliy areketniñ veteranı, partizan Muradasilov Abduramannıñ (1904-1966) arhiv vesiqalarını teslim etkeni içün büyük minnetdarlıq bildireler.
Abduraman-ağa 1904 senesi aprel 15 künü Bahçisaray rayonınıñ Tav-Badrak köyünde doğdı. Qarasuvbazar sovhozlarında terek pıtamasında çalışa edi, 1930 senesi Aqmescitte partiya mektebinde oqudı, Aqmescit-Aqyar yolunıñ qurucılığında iştirak etken edi, 1937 senesi Aluşta rayonınıñ Küçük-Lambat sanatoriyiniñ müdiri vazifesine tayin etildi. 1941 senesi avgust 18 künü Qızıl orduğa çağırıldı. 4 yıl Qırım ormanlarında partizan olğan edi.
1957 senesi milliy areketniñ faal iştirakçisi ola ve ömrüniñ soñuna qadar qırımtatar halqınıñ öz vatanına qaytuvı içün küreşe.
Arhivde qırımtatar halqınıñ milliy areketi boyunca malümat, yazışuv ve zengin tasviriy malümat toplanılğan.
Bilgiler Muradasilov Abduraman-ağanıñ arhivinden qullanılğanlar.
Em de siziñ diqqatıñızğa bu arhivden bir qaç foto taqdim etemiz.
Abduraman Muradasilov aqqında nasıldır bilgleri, vesiqaları ya da hatırlavları olğanlarnı seslenmege rica etemiz:
“İ.Gasprinskiy adına QK” QCM, Samokişa soq., 8, elyazma ve arhiv vesiqalar bölügi, tel. 249-560