www.avdet.org

Qırım musulman diniy idaresi ve ‘Tezis’ neşriyatı balalar içün İslâmnı ögretici kitaplar çıqarmağa başladılar.
2009 senesi oktâbr ayında Mürşide Uysalnıñ ‘Balalarğa diniy bilgiler’ adlı birinci kitap derc olundı. Kitapnıñ ilk neşri türk tilinde ‘Uysal yayin evi’ neşriyatı, qırımtatar tilinde ise ‘Tezis’ neşriyatı tarafından azırlandı.
Qırım müftisi Hacı Emirali Ablayev böyle qayd etti: ‘Qırım musulman diniy idaresiniñ esas maqsatlarından biri - islâm bilgilerniñ kütleviyleştirilmesi ve tarqatılmasıdır. Balalarımıznı islâm adetlerine binaen terbiye etilmesi - eñ müim vazifelerimizdendir. Zanımızca, böyle terbiyeni eñ küçük yaştan başlamaq zarur. Onıñ içün de biz böyle kitaplarnı çıqarmağa başladıq. Olardan birincisi, bu künleri çıqqan - ‘Balalarğa diniy bilgiler’ adlı kitap eñ küçük, yani 2- 5 yaşlarındaki balaçıqlarımız içün azırlanılğan. Mezkür kitap tek balalarğa degil de, olarnıñ ana-babalarına da meraqlı olur dep ümüt etemiz, çünki yazıq ki, amma İslâm temellerinen er kes tanış degil degil’.
‘Tezis’ neşriyatnıñ müdiri Ediye Müslimova aytqanına köre, neşirniñ esas maqsadı - qırımtatar medeniyetiniñ canlandıruvında iştirak etmektir. Aynı bu niyet ile kitaplar qırımtatar tilinde derc olunacaq. ‘Balalarğa diniy bilgiler’ adlı kitap - renkli, güzel resimlengen ve 5000 nusha tirajı ile çıqqan. Kitap uyğun fiyatlar ile satılacaq. Böyle etip kitapnı er bir qoranta ala bilir, neşriyat içün ise yañı kitaplarnı çıqarmağa imkân olur.

‘Balalarğa diniy bilgiler’ adlı kitapnı ‘Tezis’ neiriyat evinde almaq mümkün. Adres: Aqmescit şeeri, Klara Tsetkin soqağı, 34. Malümat içün telefon: (095) 3438406