www.avdet.org

1985 senesi Samarqand şeerinde dünyağa keldi.
1991 senesi 48-ci mektebinde oqumağa başladı.
1992 senesi qorantalarınen beraber Qırımğa köçip, mında tasilini devam etti.
2001 senesi Kün Tuvğan (Teplovka) umumtasil mektebini bitirdi.
2003 senesi Tavriya Gumanitar- Ekologik institutına ‘Dizayn. İstisal grafikası’ bölügine kirdi.
2008 senesi oquvını bitirgen soñ, çölmekçilik, örnek, ve qırımtatar medeniyetini Bağçasaraydaki ‘Çölmekçiler’ bala studiyasında ögrenmege başladı. 3 kursta oqur eken, Leyhacılıq feninde öz üslübini işlemek isteginen, Vladimir Vasilyeviç Sıçovnıñ teşebbüsi ile qırımtatar üslübinde bir leyhanı işlemege başladı. Neticede, ‘Örnek’ adlı halq esnafçılıq merkeziniñ özgün üslübi meydanğa keldi. 2007 senesi Mamut Çurlu reberliginde ‘Çatır Dağ’ icadiy birleşmesine kirdi. Mamut Çurlunen beraberlikte ‘Qırım üslübinde raatlıq odasınıñ leyhası’ işlenildi. Aqmescitte birinci sergide iştirak eter eken, Eldar halq sanatınıñ erbaplarınen, ressam- çölmekçiler - Abdül Seit-Ametov ve Rustem Skibinnen tanış oldı.
4 kursta olur eken, Eldar ‘Bereket’ virtual salon-tükânınıñ leyhasını işledi. Bir yıldan soñra da Rustem Skibinniñ ‘El-çeber’ icadiy çölmekçilik ustahaneniñ üslübi üzerinde çalışmağa başladı. Aynı zamanda da, Rustem Skibinden glazur ile resim çıqaruvnıñ tehnikası ve örnek esaslarını ögrendi. Bir kün ‘Çölmekçiler’ studiyasını ziyaret eterek, balçıq ile çalışmaqtan zevq alıp, artıq bütün ömrüni bu tılsımsı malzemenen bağlamağa istegenini añladı.
Öz çölmek mahsulatını birinci kere Ulu Çoqraq (Kurgannoye) köyünde pişirip baqtı. Ğayet istidatlı usta Abdül Seit-Ametov Eldarğa soba yanında qırımtatar örnekleriniñ hususiyetlerini añlattı.
Studiyada çalışqan vaqıtta, Mamut Çurlu onı çeşit mevzularğa bağışlanılğan öz seminarlarğa davet ete edi.
2009 senesi Eldar qırımtatar ressamlarınıñ Assotsiatsiyasına qabul olundı. Aynı şu sene Opışnâ köyünde Çölmekçiniñ milliy künü munasebeti ile bütün Ukrainadan ustalar davet etilgen edi. Qırımnı Abdül Seit-Ametov, Rustem Skibin ve Eldar Gusenov taqdim ettiler. Bir qaç mukâfatqa nail olıp, ustalar ‘Çölmek mahsulınıñ yapılması’, ‘Qırımtatar örneginiñ esasları’ kibi mevzularda ögretici çıqışlar yaptılar. Ondan da ğayrı, Eldar tarafından milliy örnekler ile bezetilgen çölmek çibereklerniñ seriyası işlenilgen edi.