www.avdet.org

Anamdan menimsegenim eñ esas tabiat çızgizi - er şeyde tek yahşılıq körmek mearetidir.

Birinci kere sanağa çıqqanda men 11 yaşında edim. Men çala ve oynay edim. Amma bular episi bala hatırlavlarımdır. Professional sanağa ise men 21 yaşında çıqtım. Seyran Mambetov maña ‘Peşraf’ leyhasını alıp barmağa teklif etti. Bu ilk tecribemni men bir vaqıt unutmam. Tehnikiy sebeplerden peyda olğan boşluqlarnı toldurmaq içün biz em lâtife aytmağa, em seyircilernen qonuşmağa, atta oynamağa mecbur olğan edik. Seyran Mambetov içün bu kontsert belki eñ zayıf edi, menim taqdirimni ise deñiştirdi. O vaqıttan başlap men muzıka muarririyetinde çalışam, Seyran ağa meni eñ birinci yardımcı dep saya. Men bunen ğururlanam. Bugün ise, ‘Qırım’ devlet teleradiokompaniyasınıñ muzıkal yayınlarnıñ baş muarriri olur ekenim, menim öz yardımcılarım da bar.

Perdeler artında ebet çeşit allar ola. Yazıq ki, dubaralarnen daa çoq bizim üyken artistler nesli oğraşa. Yaşlarımıznıñ ise, umumen aytqanda, maşallaları bar. Biz tek istidatlı degil de, güzel, vicdanli gençler ile çalışamız. Sana artındaki müitimiz olduqça sağlam, icadiy, dostanedir. Ambitsıya ve suqlanuv (müsbet manada ebet) yer almaq kerekler dep sayam, çünki olar artistlerge ilerige ıntılmağa yardım ete.
Ömür - bir köpçektir. Bugün sen töpedesiñ, yarın ise aşada ola bilirsiñ, bugün zenginsiñ, yarın ise fuqare ola bilesiñ. Zenginlik ve karyera - ömürniñ manası olmamalı. Qartlıqta, er kes musaviy olğanda, insanlar biri-biriniñ közlerine baqmağa utanmazlar. Yamanlıqqa yamanlıqnen cevap bermemeli, adamlarnı canını ağırtmağa, ıncıtmağa olmay. İnsan ne yapqanını özü bilmese biz onı qabaatlap olamamız. Vaqıt er şeyniñ yerini tapar.

Men işimni pek begenem. Bugün men stsenariy yazam, yarın kontsertke ketem, o birisi kün montaj, soñra çekim, meraqlı insanlarnen körüşüvler, zenaatdaşlarımnen subetler, artistlerniñ sanağa azırlaması, çetelge seyaatlar. Daa men zenaatımnıñ bir qısmı sayılğan, öz tış - qıyafetimnen oğraşmağa sevem. Amma eñ esası, eminim ki, yapqan işimiz halqımıznıñ muzıka medeniyetiniñ inkişafı içün kerekli ve müim bir iştir.

Qadın yüregine alıp barğan yol er vaqıt tapılır, tek o yolğa çıqmağa qorqmamaq kerek. Amma menziline tek pek istegen yete bilir.

Evde anam pişirgen aşlarnen qoquğanını sevem. Anam azırlağan aşlarını pek sevem, yazıq ki, men bu işte daa o qadar ünerli degilim.

Ömürde eñ qıyını - öz sıfatını coymamaqtır. Öz hatalarını añlamaq ve em zenaat em şahsiyet ceetinden inkişafqa ğayret etmege pek emiyetli.

Qadınlar yalandan qorqalar. Men de istisna degilim. Amma eñ çoq men balalarım içün qasevet etem. Olar sağlam, eñ-evelâ yahşı insanlar ösip çıqqanlarını isteyim.

Ebet, er bir insannıñ bir zayıf tarafı bardır. Men meselâ, çeşit boyuncaqlar pek sevem, ondan da ğayrı tatlı yemekler ögünde özümi tutamayım.

Elmaz Mambetten bir yemek reçetesi:
Men dostlarımnı almalı köbeten sıylamağa sevem. Onıñ yapılması da pek qolay. Tavanıñ tübüni temizlengen ve doğralğan almalarnen töşeyim. Üstünden biskvit hamurını tökem ve furunda 20-25 daqqa pişirem. Azır yemekniñ üstüni erendelengen şokoladnen süslemek mümkün.

Ay-melev-şe subet etti