www.avdet.org

Soñki yılları Qırımda hicap kiygen qadın-qızlarımıznı sıq-sıq rastkelmek mümkün. Lâkin qırımtatarlar arasında hicap milliy ananelerimizge uyğun kelgeninen razı olmağanlar da az degil.
İslâmda yüz ve ellerden ğayrı bütün bedenini saqlağan er bir qadın urbasına hicap denile. Zemaneviy dünyada ise hicap degende musulman qadınnıñ adetiy baş örtüsi közde tutula.
Qırımtatarlarnıñ bir qısmı hicap qırımtatar adetlerine kelişmey dep sayalar. Öylemi, aceba? Bu sualge QHAnıñ jurnalistine siyasiy ilimler namzeti, Tavriya milliy universitetiniñ siyasiy ilimler kafedrasınıñ dotsenti, ‘Zemaneviy Qırımda İslâm: tiklenüv esnasınıñ problemleri,ve indikatorları’ adlı kitapnıñ müellifi Elvira Muratova cevap berdi. ‘Zanımca, hicap kiymekte iç bir yaramaylıq yoq. İslâmda aqiqatqa yetişkenler bunı göñülden yapalar. Mesele birisi hicap kiyip, qırımtatar adet ve ananelerni bozğanında degildir, mesele alternativa olmağanındadır. Bugün-de-bugün bizim dizaynerlerimiz musulmanlar içün milliy unsurlar ile urbalarnı teklif etmeyler’ - dep qayd etti Elvira Muratova.
Qırım tarihçısı İbraim Abdullayev ise hicap kiyilmesinen ananelerimizge qaytılmaz dep saya. Onıñ aytqanına köre, Qırımda islâm er vaqıt Avropa çizgilerini taşıy edi. Yarımadada qadınlar yüzlerini parancanen bir vaqıt qapatmayıp, öz nazikligini köstere edi. ‘Qızlar başlarına fes, evli qadınlar ise marama kiye edi. Anterlerninen beraber mıtlaq quşaq qullana, bellerini sıqtıra ediler. Quşaq em endamnıñ tüzgünligini köstere, em de bir ziynet olaraq qullanıla edi. Amma şimdi kiyilgen ve qadın endamını bütünley gizlegen bol anterler evelden kiyilmegen’ - dep ikâye etti tarihçı. 

Ukraina modelyerleri hicapnen meraqlandılar.

Ukraina kutüryeleri Yaqın Şarq üslübinde urba kollektsiyasını taqdim etti. Modeller sanağa adetiy musulman baş örtüsi ve atta niqap ile (yüzüni qapatqan baş örtüsi) çıqtılar.
Lviv sanat sarayında olıp keçken ‘Lviv Fashion Week baar-yaz 2010’ adlı merasimde Ukraina, Libiya, Rusiye, Lehistan (Polşa), Frenkistandan 40-qa yaqın dizayner iştirak etti.
Tedbir çerçivesinde yaş modelyerler içün ‘Sabotaj’ leyhası taqdim olundı ve belli ukrain ve çetel dizaynerlerniñ urba, ayaqqap ve aksessuarları ile hayriye mezat (auktsion) keçirildi.

Müslim.ru