www.avdet.org

12 sentãbr künü halqımıznıñ daa bir şerefli evlãdı bu dünyanı terk etti. Çitakov İbraim 1948 senesi 3 avgustta Samarkand şeerinde dünyağa keldi. Avtomektebini bitirgen soñ aydavcı olıp çalıştı, 1967 seneleri sovet ordusına hızmetke çağırıldı. Soñra taksi aydavcısı olıp çalıştı ve aynı zamanda işlegen yaşlar mektebinde oqudı. Onı bitirgen soñ Taşkent devlet üniversitetiniñ huquq fakültetine kire. Bir qaç vaqıt devamında konsultant sıfatında çalışa, soñra prokuror yardımcısı vazifesine tayin etile. Öz şahsiy çizgileri ve professional mearetleri sayesinde qısqa vaqıt içersinde Samarkand rayon prokuyrorı, soñra Mubarek şeeri, Karşi şeer prokurorı vazifelerine tayin etildi. Soñra Özbekistan Cumhuriyet prokuraturasına keçirilgen edi. Yüksek devlet rutbelerinde bulunıp, qırımtatar milliy areketinen faal oğraşa edi. 90 ss. başında Qırım prokuraturasında çeşit vazifelerinde çalışa edi. 2001 senesi nefaqağa çıqtı. Adliye saasında teren bilgi ve büyük tecribege saip olıp, vatandaşlarımızğa eñ ağır vaziyetlerde bile huquqiy yardım köstere edi. ‘Avdet’ gazetasınıñ muarririyeti tuvğan ve yaqınlarına teren taziye bildire. Allah rahmet eylesin.