www.avdet.org

7 avgust künü Voron köyünde, cami yanında köydeşler körüşüvi olıp keçti. Körüşüvde qomşu Şelen, Ayserez köylerniñ sakinleri, Taşkent, Kazahstandan musafirler bulundılar. Körüşüvniñ teşkilãtçıları bütün iştirakçilerini resmiy qayd ettiler. 2010 senesi doğğan Ahtem Useinov körüşüvniñ eñ yaş, 1926 senesi doğğan Bekirova Melek ise eñ qart iştirakçiler oldılar. Duadan soñ tilimizniñ vaziyeti, köyniñ tarihi kibi mevzular muzakere etildi.
2009 senesinden başlap, 63 yıldan soñ bu camide kene de namaz qılına. Abdest ise 1925 senesi sakinlerniñ sermiyasına qurulğan çeşmede alına. 1998 senesi 98 yaşında Qırımda vefat etken Ahmet dedeniñ hatıralarına köre, suv ağı totlanmağan borularnen köyden 3 km mesafede yerleşken dağ çoqrağından keçirilgen edi. Voron köyniñ dağları daa çoq gizli qalğan sırlarını saqlamaqta. Mına Cami qarşısında, dağ töpesine tayanıp, taş adamı otura.. biraz sağca- Gögercin qaya. Anda 1000-den ziyade çeşit quşlar yaşay ediler.Muacirlerniñ aytqanlarına köre, quşlar qırımlılarnı sürgün etken soñ qayanı terk ettiler.Orman tarafta Su qaya yerleşe. Bu qaya üstünden er vaqıt suv tamıp otura. Dağğa biraz terence kirgende- Lakkanca dereni körmek mümkün. Dereniñ adı ‘Legençik’ sözünden kelip çıqa. Yağmur yağğanda, suv bir taş havuzundan başqasına aqıp kete. Mezarlıq yernen yeksan etildi, baş taşlar ise muacirler tarafından hocalıqta işletildi. Belli eykeltraş İlmi Ametovnıñ anası- Anife abla bütün köy boyunca aziz yerlerini toplamaqnı teşkil etti.
Malümat: Voron köyü Ayserez ve Şelen köyleri arasında, Sudaqtan 21 km uzaqlıqta yerleşe. Sürgünlikten evel mında 1000 adam, tahminen 300 qoranta yaşay edi, şimdi ise köyde 55 qırımtatar qorantası yaşamaqta. Köy inkişaf etmey. Yerli mektep yoq. Yekãne klub evelden Cami olğan binada yerleşe. Bu Caminiñ minaresi 1937 senesi yıqıldı. Bundan soñ o qapatılıp, 1942 senesi açıldı. 1944 senesi ise onı tekrar qapattılar. Cami binasınıñ yanında taa 1642 senesi oturtılğan dut teregine köre tapmaq qolay.
1000-den ziyade yıl evel Voron, Şelen, Ayserez köyleri bir büyük köy olaraq şimdi Voron ve Ayserez özenleri birleşip, Qara deñizge aqıp ketken yerde yerleşken edi. Bu yer Ayfok burunı yanında buluna. Deñiz tarafından arnautlarnıñ ucumları çoqlaşqanı sebebinden sakinler dağlarğa yaqınlaşmağa mecbur oldılar. Böyle etip bir büyük köy üçke bölündi. Köy adınıñ quş manasınen iç bir alãqası yoq. Bazı fikirlerge köre, Voron- got tamırından ‘ileri’ manasını taşıy.