www.avdet.org

Dekabrniñ 19-ında Kezlevde yerli meclis saylavları olıp keçecek. Bu tek bütün qırımtatar halqı içün degil de, ayrı regionlar, qırımtatarlar yaşağan er bir köy içün de müim vaqiadır. Ne içün, aceba? Çünki öz vaqtında yerli meclisler qırımtatar cemiyeti öz menfaatlarını qorçalaması içün teşkiliy bir şekilge malik olğanı içün meydanğa ketirilgen edi. Bundan da ğayrı, yerli meclisler, çeşit fikir ve noqta-i nazarlarnıñ tarafdarlarını, olarnıñ yahşılıqqa ıntıluv ve ğayretlerini birleştirmege yardım etmekteler.
Bizim regionımız büyük olmasa bile, emiyetine köre bayağı qıymetlidir. Mında halqımız içün müim tarihiy degerlikler saqlanılğan ve bizim faal erbaplarımız qırımtatar halqnıñ medeniyeti tiklenilmesi oğrunda eñ yüksek derecede ğayret köstermekte.

Yerli ve regional meclisler çezgen ve daa çezilmesi kerek olğan meseleler daa çoq içtimaiy-iqtisadiy saasına aittir: abadanlaştıruv, infrastrukturasınıñ meydanğa ketirilmesi, yaşlarnı işnen temin etilmesi. Balalarımıznıñ boş vaqıtlarını da teşkil etmek, yani milliy tarih ve medeniyetni ögrenüvge celp etmek maqsadınen bir de bir tögerekler, klublarğa davet etmek meselesi de ortada turmaqta.
Semetdeşlerimizniñ problemlerini çezmek içün imkânları olğan yerli akimiyet ile yahşı munasebetler qurulması da bizler içün bayağı emiyetlidir. Tecribemizge köre, quvetli birlikte çalışqan meclisler olğan yerde semetdeşlerimizniñ meseleleri daa effektiv tarzda al oluna. Amma, yerli akimiyet yerli meclisler ile munasebetlerni tek meclis artından halq sıfatında küç olğanda qurğanları sır degildir.
Problemlerni beraberlikte, umumiy ğayret ile çezmege daa effektivdir. İşte bu ğayretlerni birleştirmek - yerli meclislerniñ vazifesidir. Onıñ içün yerli meclislerge qarar almağa bilgen ve o qararlarnı amelge keçire bilecek, tek şahsiy degil de cemaat menfaatlarını qorçalacaq, tenqitni añlağan ve ilk yeñüvden soñ bile küreşni devam etip olacaq insanlar kirmesi pek müimdir. Aynı böyle insanlarnı, biz qırımtatarlar öz aramızda tapıp, olarnı yerli meclislerge teklif etmelimiz, olarğa destek köstermek kerekmiz.
Eñ azından, saylav künü kelip, öz reyiñizni beriñiz, amma bundan soñ da çette turmayıp, problemlerniñ çezilüv yollarını nasıl körgeniñizni añlatıñız. Bugünki ve kelecekteki yaşayışıñıznen bağlı meseleler sizsiz al etilmesin.

Resude İzmaylova. Qırımtatar Milliy Meclisiniñ içtimaiy- iqtisadiy meseleler idaresiniñ yolbaşçısı