www.avdet.org

Er birimiz bu dünyada qıyınlıqlar ile rastkelemiz ve olarnı yoq etmek içün bayağı em maddiy, em maneviy küçlerimizni masraf etmege mecbur olamız. Doğru yolnı tapqanımıznen ise Allahqa rameti ve yardımı içün minnetdarlıq bildiremiz.
Amma öyle allar ola ki, insannıñ başına tüşken belânı yoq etilmesi epimizniñ ğayretlerini birleştirmesini talap ete.
Qırımtatar Milliy Meclisi ve Qırım musulman diniy idaresine acele sürette tedaviylenmesine muhtac olğan ağır hasta balaçıqlarnıñ ana-babaları muracaat etmekte. Şu balaçıqlarnıñ vaziyetlerini tüzetmek içün bayağı sermiyalar kerek. Devlet ise olarnı tölep olamay.
Böyle muracaatlar kelgen soñ biz hasta balanıñ qorantasındaki maddiy alını ögrenemiz, ekimler ile muzakere ete, tedaviy esnasına qoltutmağa tırışamız, amma yazıq ki, kerekli paralarını tapılması bayağı vaqıt ala bile. Hasta balaçıqlarnıñ vaqtı ise aslı yoq.
Göñülden yardım ve cümertlik - islâmdaki qıymet sistemasında eñ müim maddelerdendir. Vatandaşlar tarafından hasta balalarnıñ tedaviylenmesine kerek olğan hayriye aqça berilmesinden ibaret ‘Merhametlik’ aktsiyalarnıñ keçirilmesi qırımtatar cemiyetinde artıq adet olıp qalmaqta.
Başqasınıñ belâsını yürekten añlağan ve elinden kelgeni qadar yardım köstergenlerden Allah razı olsun!
İnsalarnıñ göñülli yardımları sayesinde onlarnen hasta ballar içün vaqtında tedaviylenmege imkânlar yaratıldı.
Qurban bayram arfesinde, yani iman temelleşüvi, göñüllerniñ hayırsız niyetlerden boşanma ve samimiylikke qavuşmanıñ quvançlı devrinde keçirilgen bu hayriye aktsiyamız nevbetteki hasta balalarnıñ tedaviylenmesine ve ameliyatlar keçirilmesine doğrulğandır:
Cemile Boka - 1,5 yaşında,diagnozı: IV dereceli sağırlıq. Aqmescit rayonı Yañı Sarabuz (Ukromnoye) köyünde yaşay.
Ervin Qadırov - 5 yaşında, diagnozı: aş yolunıñ atreziyası, traheopişçevod svişçi, gidrotsefaliya, spastik tetraparez. Aqmescitte yaşay.
Eldar Mahmedov - 4 yaşında, diagnozı: ciger polikistozı, öt yollarnıñ kistası, anemiya. Sudaq regionı Osmançıq (Holodovka) köyü.
Şevket Nebiyev -10 yaşında,diagnozı: sağ sanınıñ doğma anomaliyası. Qurman rayonu, Büyük Onlar qasabasında yaşay.
Elmar Seydametov -1,4 yaşında, diagnoz: partsıal qızılhüceyre anemiyası. Qarasuvbazar rayonı Keñ Toğay (Litvinenkovo) köyünde yaşay,
Halide Suleymanova - 9 yaşında, diagnozı: qursaqardı boşluqnıñ neyroblastoması. Bagçasaray rayonı Şüri (Kudrino) köyünde yaşay,
Ruslan Çagley -3 yaşında,diagnozı: keskin limfoblast leykozı LI variantı, birinci ağır devri. Sudaq rayonı Qoz (Solnechnaya Dolina) köyünde yaşay.

Aktsiya ketişatında öz para yardımıñıznı Qırım musulman diniy idaresiniñ esabına yollay bilesiñiz:
КРД АО «Райффайзен Банк Аваль», ОКПО 23450183,
МФО 324021 р/с 260081414

Yardımıñıznıñ maqsadını da ‘hasta ballar içün hayriye yardım’ dep yazıñız. Bundan da ğayrı, Qırım Müftiyatına da şahsen, ya da işanğan adamlarıñız, imam, meclis reisleriniñ yardımı ile bere bilesiñiz: Aqmescit şeeri, Kurçatov soqağı, 8 (Kebir cami).
Hasta balalar içün toplanılğan sermiyadan er bir balağa yardım parasınıñ miqdarı aktsiyanıñ teşkil eticiler tarafından, ekimlerniñ tevsiyeleri mücibi kütleviy haber vastaları ve cemaatçılığınıñ yanında tayin etilecek. Bu maqsat ile ‘Merhametlik’ aktsiyasınıñ nezaret şurası teşkil olundı. Onıñ terkibine Milliy Meclis reisi Mustafa Cemil, Qırım musulmanları müftisi hacı Emirali Ablayev, belli uquqqoruyıcı, qırımtatar milliy areketniñ veteranı Ayşe Seitmuratova, qırımtatar yazıcılar birliginiñ reisi Riza Fazıl, Qırım müendislik-pedagogika universitetiniñ rektorı Fevzi Yaqubov, Milliy Meclis reisiniñ birinci muavini Refat Çubarov, Milliy Meclis reisiniñ muavini Remzi İlyasov, Milliy Meclisniñ azası, QMC sağlıqqoruyucılıq naziriniñ muavini Tair Musayev, Milliy Meclisniñ azası Sadıq Tabaq.
‘Merametlik’ aktsiyasınıñ teşkilcileri qırımtatar cemaat teşkilâtlarını, iş adamlarını, semetdeşlerimizni, diger millet vekillerini de aktsiyamızğa qoltutmağa çağıra.

Qırımtatar Milliy Meclisi
Qırım musulman diniy idaresi