www.avdet.org

Bu seneniñ oktâbr 11 künü Aziz Asanov birincilikni alıp nevbetteki kere öz çekisinde Qırım çempionı oldı.

Aziz qorantalarındaki ballarından eñ büyügidir. Öz küçük oğlan qardaşları İlyas, Qayser ve yekâne qız qardaşı Nilüfer içün o eñ güzel örnek ve ğururıdır. Ğururğa lâyıq ki!

Onıñ ana-babası Nariman ve Gülnara Asanovlar 1990 senesi Maryinoda ‘narazılıq alanları’nıñ başında turğanlardan biridirler. Aziz 10 yaşında olıp, ana-babasına ev qurmağa yardım ete edi. Birinci sınıftan başlap ana-babası onı ve küçük qardaşı İlyasnı oyunğa, soñra ise muzıka mektebine akkordeon sınfına berdi. 2003 senesi mektepke şimdi rametli olğan trener A.N. Lunin kelgen edi. O, oğlançıqlarnı yunan-roma küreşi sektsiyasına toplay edi. Birinci olaraq İlyas yazıldı, Aziz ise onıñ artından ketti. Böyle de ögrendiler: aftada 2 kere – küreş, aftada 3 kere – muzıka. 2007 senesi ise oğlanlar temrinlerni ‘Dinamo’da keçirmege başladılar.
Bugün-de-bugün Yu.N.Sologub, V.A.Krayuşkin oğlanlarğa sportnıñ bu çeşitinde yeñişlerge yetmege yardım etmekteler. Aziz bir qaç defa Qırım ve bütün Ukraina birinciliklerinde mükâfatlar qazanğan edi.
Bu yıl yigit 21-inci mektebiniñ qırımtatar tilli sınfını bitire. Cesürlik, maqsadına ıntıluv ve ğalebege irade bu yigitni başqalardan ayırğan tabiat çizgileridir. Bular onı hayalına, yani 2010 senesi kadetler arasında olimpiadağa ketmek arzusına yaqınlaştırır degen ümüt etemiz.