www.avdet.org

Ноябрь 21 куню театримизнинъ огюнде олып кечкен ве энди эр кеске малюм олгъан къокъла якъув тедбири эпимизни кедерлендирди. Бу адден тыш чиркин арекет Халкъымыз акъкъында даима мусбет олып кельген фикирлерге кирли бир леке ташлады ки, бунъа ич лякъайд бакъмакъ мумкюн дегиль. Насыл ола да, анълагъанымызгъа коре, топракъ меселеси себебинден тешкиль этильген тедбирде бойле чиркин арекетке ел бериле? Буны анъламакъ мумкюн дегиль. Эльбет, Меджлиске къаршы, Меджлис реисине къаршы бу арекетни айры бир шахслар япса керек. Ойле олса да, бунынъ лекеси анда топлангъанларнынъ эписине тюше.
Меджлис мукъаддес бир орган дегиль ки, онынъ акъкъында ич бир шей айтылмасын. Эм айтыла, эм языла. Шимди демократия деври. Амма эр шейнинъ бир къарары бар. Театр огюнде япылгъан кийиклик арекети исе ич бир ерге сыгъмайджакъ шей. Бойле шейге, къайда олсун, не ерде олсун, ел бермемек керек. Къаш якъаман деп, козь чыкъармакъ олмаз. Халкъымызнынъ адыны кирлемейик, онынъ юзюне леке тюшюрмейик.
Биз, языджылар, бойле шейге озь наразылыгъымызны бильдиремиз.

Къырымтатар языджыларынынъ ноябрь 28-де отькерильген
топлашувында къабул олунды