www.avdet.org

 Dedem Qırımnıñ inqilãptan ve cenkten evel devrinde yaşayış aqqında ikãye etkende ‘çalağaç’ sözüni añğan edi. Ondan qaç sefer '‘Çalağaç pişirdik’, ‘Çalağaçnen sıyladılar’ kibi sözlerni eşittim. O vaqıtta men pek de meraqlanmay edim. Bir kün tanış qasapçınen laf etkende, o maña dedesinden etni al etmege ögrengenini ikãye etti. Er bir kesekniñ öz adı bar edi. Qaburğa ve belkemik olğan yerge çalağaç dey ekenler. Neticede bu kesek etten azırlanğan aşnı da ‘çalağaç’ dep adlandırdılar.

Bu yemekni azırlamaq içün bizge kerek olacaq:
Et ve biraz yağı olğan qoy qaburğaları- 280-300 g.
Marinadlı soğan-30 g.
Alma sirkesi, ya da limon şırası- 1aş qaşığı.
Marinad içün:
Soğan-100 g.
Fesilgen-quru, ya da taze
Tuz, biber- istegeniñiz qadar
Defne yaprağı.
Başta soğan ve fesilgenni ince doğrap, tuz ve bibernen qarıştıramız. Bu qarışmanı etke qoşıp, salqın yerge eñ azdan 4 saatke qaldıramız.Soğannı alqalarğa kesemiz.Tuz, biber, alma sirkesini qarıştıramız. Adet üzre, marinadtaki alma sirkesi yerine limon şırası, nar şırası, ya da sade sirkeni işletmek mümkün. Bu qarışmağa soğannı qoşıp, 10 daqqağa qaldıramız. Marinadta turğan etni şampurğa tizip, yanğan kömür üstünde 15 daqqa qızartamız. Azır çalağaçnı şampurlardan çıqarıp,marinadlı soğan ve yeşilliknen beraber sofrağa qoyamız.
Çalağaçnı daa tavada da azırlamaq mümkün, amma bu endi başqa mesele..
ATO!
P.S.: eski, aman-aman unutılğan yemek tariflerini bilseñiz, bizim oquyıcılarımıznen paylaşsañız sizge pek minnetdar olur edik. Sevgen aşlarnıñ tariflerini nevbetteki adresler boyunca yollañız: 95017 Aqmescit ş., Şmidta soqağı, 2\27, ya da avdet2003@mail.ru , irus2006@mail.ru