www.avdet.org

 Camala “Avdet”ke Aqmescitteki kontserti, açıq köküsler ve futbol aqqında tarif etti.

- Aqmescitteki kontsertiñ Ukraina turuñdaki diger kontsertleriñden farqlı edimi?
- Menim içün Aqmescitteki kontsert turumda eñ eyecanlı edi. Kontsertte Server Kakura, Enver İzmaylov kibi, qırımtatar muzıkantlarımız, muzıka oquv yurtundan ocalarım, mektep dostlarım, doğmuşlarım, ailem, vatandaşlarım bar edi. Yaqın insanlar ögünde çıqışta bulunmaq daa ağır. Mahsus bu kontsert içün “For every heart” albomına kirgen yırlarnen beraber beş qırımtatar yırını azırladım. Em de yahşı muzıkant, akkordeoncı olğan babamı mennen çıqışta bulunmağa qandırıp oldım.

- İcadında halq muzıkası nasıl yerni ala?
- Halq muzıkası menim içün tamırlarımnıñ, balalığımnıñ muzıkasıdır, bundan ayırılmam. Soul, pop, djaz, fank muzıkasını yapsam bile, cenüp tamırlarım deñişmez. Bazı teñqitçiler aytalar ki, djaz kompozitsiyalarımda bile bu nağmelerni tapmaq mümkün.
- Bizde Qırımda eki djaz yıldızı bar, sen ve Enver İzmaylov, birlikte duet aqqında tüşündiñmi?
- Enver İzmaylov – acayıp muzıkant, ondan da ğayrı ailemizniñ, babamnıñ dostu. Birlikte bir şey yapmaq, belki, bir de bir festival çerçivesinde... Maña köre, meraqlı olur edi.
- Qırımtatar albomnı çıqarmaq planıñ barmı?
- Maña köre, şimdi qırımtatar muzıkası albomını çıqarmaq menim içün qolay olur edi. Daa ağır tarafı şunda ki, qırımtatar muzıkasınen tanış olmağanlarnı menim müellif kompozitsiyalarım vastasınen celp etmek. Yani öyle yapmaq kerek ki, qırımtatar muzıkasını Qırım radio ve TV’sinden ğayrı diger yerlerde de diñlesinler. Onıñ içün qartanama bağışlanğan “Pencereden” yırını albomğa boşuna kirsetmedim. Ve Kiyevde yerli radioda bu yırnı eşitkende, pek quvanam. Şimdi ekinci albomnı yazam, o başqaca olacaq, daa da canlı. Men deñişmecem, daa da ilerilecem. Ve bu albomda da qırımtatar yırları olacaq.
- Özüne ne qadar talapkârsıñ?
- Muzıkağa kelgende, men maksmalist ve perfektsionistim, er yapqan şeyim pek yahşı, ideal olğanını isteyim. Bu, maña babamdan keçti.
- Tezden Evro-2012 olacaq, sen futbolnı sevesiñmi?
- Yoq, bu sport çeşitiniñ sevdası degilim, amma ülkemizniñ ğalip çıqqanını ister edim, ebet. UEFA’dan resmiy teklif aldım – Euro-2012’niñ, belki, gimni ola bilecek yırnı yazmaq, çünki tek o yazılğan soñ kelişkenini añlamaq mümkün. Komandamnen “Goal” yırını yazdıq, onı endi icra etken edim. Bu yır resmiy gimn olurmı, yoq, bilmeyim, baqarıq.
- Sen endi bir qaç kere imidjini deñiştirgen ediñ, şimdi mına yañı perçem... Üslübiñ üzerinde kim çalışa?
- Öz obrazlarımı özüm yaratam, kostümlerimi özüm alam, daa çoq çetel memleketlerde, amma alış-verişke çoq vaqtım olmay. Öz urbalarımnı öyle seçem ki, sanada muzıkal sıramı tamamlasınlar. Açıq köküs, qısqa etek – sanada maña keder ete. Ebet, güzel olmaqnı sevem, em de seyirci diqqatınıñ muzıkağa celp etilgenini isteyim. Yañı perçem – tek qadınnıñ güzel olmaq istegidir, gizli piar degil.

- Sen muzıka yazasıñ. Umumen, muzıka yazılması – sırlı esnastır. Sende bu nasıl ola?
- Er vaqıt farqlı. Birinci albom içün muzıka tesadüfen doğğan edi, aytmaq mümkün. Soqaqta diktofonğa bir şeyler yaza edim, bazı şeyler - atta duşta, yani yañı ğayeler kelgende, yaza edim. Bu, ğaliba, Çaykovskiyde saat 9-da – qavaltı, saat 10-da ilham edi. Mende öyle degil. Ekinci albomnı endi añlı yaza edim, içmde bir de bir şey yetişkenini duya edim. Umumen ise, pek az yazdım.
- Bir de bir ayat felsefeñ barmı?
- İnsanlarnıñ özüne nasıl davranğanını isteseñ, olarğa öyle davrañ. Nege inansañ, tek onı yap. Sevgen işnen oğraş. Bütün dünyada bu, pek büyük problemdir. Öz zenaatını sevmegen insanlar bizni çekiştireler. Restoranğa kelemiz, ve ofitsiant olmağa istemegen insan “başıña tabaqnı kiydire”. Soñra bütün künge keyfiñ bozuldı. Stiv Djobs (amerikalı iş adamı – muar.) dedi ki, nege inansañ, onı yap, bu iş saña em keyf, em para ketirir.
- Bu sual, belki, çoq berile, amma yaş bekârlar içün pek aktualdir: şahsiy ayatıñ ise nasıl?
- Bu sual ana-babamı da meraqlandıra (küle). Men öyle ayta bilem: er qıznıñ öz vaqtı bar, ve bir kün o kelir. Menim vaqtım daa kelmedi. Öz şahsiy ayatım aqqında laf etmege sevmeyim, çünki yırlarım pek samimiy, meni tanımağa isteseñiz, muzıkamı diñleñiz.
- Öz hurafatlarıñ barmı?
- Yoq. Men Allahqa inanam ve dua etem. Bu, maña yardım ete.

Metin ve foto Ayşe Yunusova