www.avdet.org

Babam meni tacik toylarına alıp ketkende men 5 yaşında edim. Ufaçıq qızçıq, siya saçlar, qara közler ve keniş qaşlar... Men toy repertuarından bir qaç tacik yırını bile edim. Maña olardan bir-de-birisini icra etmege rica ete ediler. Men de yırlay edim. Men bunı da şunıñ içün yahşı hatırlayım ki, toylar pek keç başlay edi, men ise er vaqıt yuqlamağa istey edim.
Yırlağanda men tek icra etken yırım aqqında tüşünem. Türküniñ mündericesini bilip ve duyıp, men onıñ manasını añlayım, yaşayım. Yır - qısqa bir spektakldir. Onıñ obrazları çoq, amma icra etici birdir.

Qırımtatar nağmeleriniñ dülberligi göñlümni ilham, Vatanıma, yaqınlarıma sevgi ile toldura. Bu muzıkada em halqımıznıñ urf-adetleri ve Qırımnıñ tabiat dülberligi saqlıdır. O maña bu ayatta öz-özümni tapmağa yardım etti. Men  ana-babalarıma (Allah ramet eylesin), qırımtatar halq yırına maña sevgi aşlağanları içün pek minnetdarım.

Cemaatımıznıñ belâsı şunda ki, ayatnıñ degerliklerini unutamız, urf-adetlerimizni coyamız, biri-birimizni diñlemege bilmeymiz.

Maddiy degerlikler nisbiydir. Menim içün menim qorantam, ana-babam, tilim, sanatım, etraftakilerniñ işançınıñ qıymeti ölçülmezdir.

Ev - bu bir kermendir. Bu kermen içinde aile özüni oñaytlı, imaye altında olğanını duymaq kerek. Böyle kermen ana-babalarımız bizge aşlağan ananelerni saqlay.

Ömrümniñ esas erkegi - menim aqayımdır. O menim içün em dost, em mesleatçı, em tenqitçi, em ocadır. Babam vefat etken soñ, o menim içün er vaqıt doğru tevsiye bergen, yol köstergen, qoltutqan, yardım etken ikmet saibidir. Ömrümniñ esas erkegi ile men özümni qaviy divar artında kibi duyam.

Balalar ösken soñ mesüliyetligimiz arta. Ayatiy allar tekrarlana, amma olarğa sen endi yaşlıqta kibi degil de, başqa közünen baqasıñ. Balalarıñ ögünde lâyıq sıfatta bulunmaq içün öz tasilini arttırmağa tırışasıñ.
Boş bir daqqam peyda olsa, men el işinen oğraşam, milliy qoqlalarnı yaratam, Qoran qapı, kiseler, yastıq üstlerini nağışlayım, tikem. Bundan da ğayrı, çeçeklerni asrayım. Evimizni qıntavlı etmek - menim sevgili işimdir.

Qadınnıñ ikmeti ne vaqıt kele? Birisine ikmet miras olaraq keçe, başqasına onı ömür tecribesi bağışlay. Menimce bu yerde nasıl yıldız uyumı altında doğğanıñ da emiyetlidir.

İnsan tüşe bilecek eñ havflı tuzaq - tüşünmeyip yapılğan areketler, özüne olğanından ziyade qıymet kesmektir.

Men adiy künlerde menim ve yaqınlarımnıñ bayram keyfi olğanını sevem. Er munasebette samimiylik, yardımğa kelmek meareti pek emiyetlidir. Böyle munasebetler ömrümizni uzaqlaştıra, onı daa keyfiyetli ete.

Ay-melev-Şe subet etti.