www.avdet.org

Almaniyadan, yüreklerimizni qayğı ve keder ile sarıp alğan haber keldi. Milliy davamıznıñ çetelde yaşağan eñ faal iştirakçilerinden biri, qalem istidadını qırımtatar halqınıñ aq-uquqları tiklenilmesine semereli hızmet ettirgen yazıcı, şair, publitsist, ateşin vatanperver ve milletsever insan Feyzi Rahman Yurter bu faniy dünyanı terk etti. 
Feyzi ağa Sudaq rayonınıñ Ay Serez köyünde 1927 senesi mayısnıñ 1-inde doğdı. Qorantası, ruhaniylerden olğanı içün, köyni terk etmege mecbur oldı, çoq azap çekti. 1944 senesi alman basqıncıları onı mecburiy işlerge aydadılar. ‘Ostarbayter’, lagerlerde mabüs oldı, siyasiy qaçaq olaraq 1948 senesi Türkiyege barıp tüşti. Mında litseyde oqudı, soñra Ankara universitetini bitirdi. Qırımtatar medeniyeti ve yardımlaşma derneginiñ yolbaşçısı vazifesini eda etti.
İstidatlı genç, fırsat tapıp, kene de demokratik Almaniyağa oqumağa kete, müendislik zenaatını menimsey ve müessiselerniñ birisinde çalışmağa başlay. Amma, Feyzi Yurter, ne yerde olmasın onıñ fikirleri, aytqanları daima Vatanı - Qırım, doğmuş halqınen bağlı edi.
Bu sözlerniñ taşdıqı, şu cümleden, Feyzi ağanıñ icadında körüne. Soñki 20 yıl içinde ‘Yıldız’ mecmuasında onıñ onlarnen vatanperver maqaleleri, hatırlav ikâyeleri, şiirleri derc etildi. 1998 senesi ise Türkiyede Feyzi ağanıñ eñ salmaqlı ‘Yigirminci yuzyılda Qırım’ adlı avtobiografik eseri basıldı. Milletimizniñ başına tüşken facia, onıñ Vatan ile qavuşmaq, aq-uquqlaqrını tiklemek oğrunda cesür küreşi - Feyzi Yurterçün esas mevzu, ilham menbası oldılar. Onın istidadı tolusınen halqımızğa hızmet etti ve halqımız da onı öz hatırasında ebediy saqlar. 
Kütleviy avdetimiznıñ eñ ağır - 90 seneleriniñ başında Feyzi ağa vatandaşlarımızğa bir sıra maddiy yardım kampaniyasınıñ teşkilcisi oldı. Feyzi Yurter onı bilgenler, onıñ eserlerini oquğanlar, o aqqında eşitkenler içün vatanperverlikniñ parlaq temsillerinden biri olacağına şübe yoq. 
Onıñ yaqınlarına, şu cümleden qardaşı Fikret ağa Yurterge öz samimiy taziyemizni bildiremiz ve baş sağlığı tileymiz.

Allah rahmet eylesin.  
Qırımtatar Milliy Meclisi.