www.avdet.org

Tacıkistanda nam qazanğan artist, QMC nam qazanğan medeniyet erbabı, ‘Güldeste’ adlı şarq oyunı bala ansamblniñ bediy reberi.
Oynamağa başlağanda qaç yaşında olğanımnı atta hatırlamayım, amma o vaqıtta men daa mektepke qatnay edim. Ufaq qızçıq olur ekenim, men evde kontsertler teşkil ete edim. Renkli urbalar tapıp, kiyip aqlıma kelgenini oynay edim. İlk oyun derslerimni qartbabam Üsein Baqqaldan alğan edim. Çkalovsk şeerinde(Tacikistan), yerli medeniyet evinde o qırımtatar oyun tögeregini teşkil etken edi. Balalığımdan oyuncı olmağa hayal ete edim. Bunu ne içün arz etkenimni añlatmağa yengil degil. Er alda qan tesir etkendir, çünki men artistler qorantasında doğdım: qartbabam- Usein Baqqal, babam- Asan Refatov, tizem- Remziye Baqqal, olar episi oyuncılar ediler.
Qırımtatar oyunı- bu letafet, gratsıya, ifadelik, plastikliktir. Onı iç bir diger oyunnen qıyas etmek mümkün degildir. Soñki vaqıtta qırımtatar oyunı bayağı deñişti,o daa mürekkep, amma aynı zamanda da daa dülber oldı. Lãkin, yazıq ki, o folklor unsurlarını coymağa başladı.

Gastroller, gastroller, gastroller....İndiya, İran, Pakistan, Vengriya, Çehoslovakiya, Avstraliya, Almaniya, bütün sabıq Sovet Birligi. Amma 1985 senesi Afganistannı bir vaqıt unutmam. O vaqıtta, cenkniñ eñ ateşli devrinde aman aman qurşunlar tübünde oynamağa mecbur edik.
Hayatımnıñ eñ acayip daqqalarından biri- Tacıkistanda nam qazanğan artist unvanını qazanğan vaqtım. Söz kelimi, bunı men gazetlerden bildim.
Balalıqtan alã filmler seyir etmege sevem. Yaşlıqta büyük zevqnen romanlar oquy edim, amma şimdi, yazıq ki, buna vaqıt qalmay.
İnsanlarda ekiyüzlülik ve yalancılıqnı iç qabul etmeyim.Böyle insanlarğa diqqat etmemege tırışam.
Qadın zamanına uyıp kiyinmek kerek. Daima elegant ve nazik olmalı.
Hayat meni nege ögretti? Er alda, birinciden, qıyınlıqlarnı yeñmege ögretkendir. Men er vaqıt er şeyge qıyınlıqlardan keçip yetişe edim.
Optimizmımnıñ sırı- ruhtan tüşmemektedir. Ne qadar ağır olmasa bile, öz keyfsizligiñizni köstermemekni tırışmaq. Men ğaliba tebessümnen doğdım, sana ise onı qaviyleştirdi.
Hayatnıñ keyfiyeti bahtnıñ miqdarı ile deñişe. İcadım maña baht bağışlay. Evelden men öz hayatımnı oyunsız tasavur etip olamayım, şimdi ise, ‘Güldeste’ ansambli ve anda çalışqan balaçıqlarsız ömrümni köz ögüme ketirip olamam.