www.avdet.org

Qırım Muhtar Cumhuriyetiniñ

Yuqarı Şurasınıñ Reisi

A.P. Gritsenkoğa

“Vatan qanatları” qırımtatar aviatorlar

teşebbüs gruppasınıñ

keñleştirilgen oturışınıñ

M U R A C A A T I

Ürmetli Anatoliy Pavloviç!

 “Aqmescit” halqara avaalanı” Açıq aktsioner cemiyeti – yarımadamıznıñ yekâne ve baş ava limanı, onıñ ziyaret varaqasıdır.

Avaalanınıñ statusı, adı, içki ve tış körünişi, infrastrukturası, territoriyasınıñ körünişi ve vaziyeti, hızmet seviyesi ve başqa faktorlar yolcularda Qırım ve ealisi aqqında birinci teessuratlar doğura.

Dünyada pek yahşı adet bar – avaalanlarğa milliy qaramanlarnıñ adları berile. Meselâ, Djon Kennedi adına avaalanı (AQŞ), Ben Gurion adına (İsrail), K. Atatürk adına (Türkiye),  De Goll adına (Frantsiya) avaalanları ve başqaları, bu ise devletniñ vatandaşları öz tarihine ürmet köstergenini ve milliy çizgilerini qayd ete.

Biz, aşağıda imzalanğanlar, tüşünemiz ki, Qırımda doğğan, Qırımnı alman-faşist basqıncılarından azat etilmesi boyunca uruşlarda iştirak etken Sovet Birliginiñ eki defa Qaramanı, ulu uçucı-as Amet-Han Sultan doğğanınıñ 90 yıllığı (20.10.1920) qayd etilmesine azırlıq tedbirleri çerçivesinde qırım Muhtar Cumhuriyetiniñ Yuqarı Şurası “Aqmescit” halqara avaalanına Sovet Birliginiñ eki defa Qaramanı Amet-Han Sultan adı berilmesi aqqında qarar qabul etmek kerek. 

 Qanun boyunca, müessiseniñ tesis vesiqalarına (şu cümlede, müessise adınıñ deñiştirilmesidir)deñişmeler kirsetmek aqqı tek saibine (saiplerine) aittir.

“Aqmescit” halqara avaalanı” AAC bütün aktsiyalarnıñ (demek, avaalanıñ) yekâne saibi – Qırım Muhtar Cumhuriyeti yani Qırım Muhtar Cumhuriyetiniñ Yuqarı Şurasıdır. Tek o (QMC Yuqarı Şurası), öz qararınen bu aviamüessiseniñ tesis vesiqalarına avaalanına Sovet Birliginiñ eki defa Qaramanı Amet-Han Sultannıñ adı berilmesi ile deñişmeler kirsetebile.

Yuqarıda aytılğanına binaen, sayğılı Anatoliy Pavloviç, Qırım Muhtar Cumhuriyeti Yuqarı Şurasınıñ yaqındaki sessiyasında baqılacaq sualler cedveline “Aqmescit” halqara avaalanı” Açıq aktsioner cemiyetine Sovet Birliginiñ eki defa Qaramanı Amet-Han Sultannıñ adı berilmesi aqqında” meseleni kirsetmek ve bu mesele boyunca müsbet qarar çıqarmaq ricasında bulunamız.

“Aqmescit” halqara avaalanına belli insan, qırımlı, efsaneviy as, uçucı-qaramannıñ adı berilmesi iç bir para masraflarını talap etmey (avaalanınıñ yañı müür yapılmasından ğayrı).

Aynı vaqıtta, bu muracaatnıñ Qırım Muhtar Cumhuriyetiniñ Yuqarı Şurası tarafından qabul olunması (nevbetteki raatlıq sezonnıñ arfesinde) cemiyetke muhtariyette tolerantlıqnıñ ükün sürmesini, Qırım ükümeti yarımadamıznıñ namı ve cazibeligini tüşüngenini kösterir, em de “Aqmescit” avaalanınıñ halqara olaraq statusına müsbet tesir eter.

Teşebbüs gruppasınıñ keñleştirilgen oturışında Aqmescit şeerinde 2010 s. 7 yanvar künü qabul olundı.