www.avdet.org

Müftiyatnıñ izinini almadan diniy ya da başqa tedbirlerniñ Qırımnıñ musulman aziz yerlerinde keçirilmesini yasaq etken qararnıñ çıqarılması musulmanlarnıñ serbestligini sıñırlamaq içün degil de, musulmanlarnı çeşit diniy sektalarnıñ tesirinden saqındırmaq. “Milliy Fırqa” cemaat teşkilâtınıñ “Birleştirmek içün çalışacaq müftiy soñki vaqıt farqlı yasaqlarnen oğraşa” degen fikrini Emirali Ablayev QHAğa böyle tefsir etti.
Emirali Ablayev aytqanına köre, Müftiyatnıñ vazifesi – musulmanlarnı inkişaf etmek ve qorçalamaqtır. “Amma soñki vaqıt Qırımda olıp keçken vaqialar maqsadımızğa uymaylar. Çeşit diniy firqalarnıñ ve aqıntılarnıñ çoqlaşması halqımıznı raatsızlay. Olarnıñ tesirine tüşken balalar öz ana-babalarını tanımayıp başlaylar. Ramazan ayında olıp keçken davalar da musulmanlarnıñ bölünmesi yahşılıqqa ketirmecegini köstere”, - dedi o. “Tamam onıñ içün Qırım musulmanlarınıñ diniy idaresiniñ izinini almadan diniy ya da başqa tedbirlerniñ Qırımnıñ musulman aziz yerlerinde ve cami içinde ve etrafında keçirilmesini yasaq etmek qararına keldik. Bizim faaliyetimiz musulmanlarnıñ serbestligini sıñırlamasına degil de, musulmanlarnı çeşit diniy sektalarnıñ tesirinden saqındırmasına yöneliş ala” dep qayd etti müftiy.
“Müftiyat iç bir vaqıt halqnıñ bölünmesine yönelmey edi. Eger men, müfti olaraq, öyle pozitsiyada tursam (musulmanlarnıñ bölünmesini közde tuta), QMDİniñ keñeşi halqqa qarşı zararlı areketler yapmaq bermez” dep añlattı o.
“Miliy Fırqa” teşkilâtınıñ faaliyetine kelgende ise E. Ablayev qayd etti ki, “olarnıñ işleri “Hizb-ut-Tahrir”den çoq farqlı degil. Ekisi de halqnı böle”. “Tamam bunıñ içün qırımtatarlarnıñ temsil organı olğan Milliy Meclisten ayrı çalışqan “Milliy Fırqa” tarafından teşkil etilgen Qırımtatarlarnıñ umummillet meclisinde iştirak etmege istemeyim” - Müftiyat bu tedbirni musulmanlarnıñ aziz yerlerinde keçirilmesine qarşı olğanını qoşıp yekünledi Qırım musulmanlarınıñ yolbaşçısı.

Saide Acimambetova